A Secretaria Xeral da Mocidade Nacionalista Galega, Balbina Gándara, vén de facer un chamamento "ao sector crítico das XSG" para a súa integración na MNG. Gándara considera “total e absolutamente imposible que o PSdG-PSOE asuma posicións galeguistas”, ademais de tamén crer "improbable" que "mude a súa política económica e social".
A MNG diríxese en especial aos integrantes da candidatura Somos Presente, artellada para o recente congreso das Xuventudes Socialistas. “Se os mozos e mozas de Somos presente queren desenvolver un proxecto político que teña o centro de decisión en Galicia, combativo cos recortes que estamos a sufrir e coa política de austeridade, á vez que propositivo, na Mocidade Nacionalista Galega teñen o seu referente. Nós tendémoslle a man para construír xuntos”, salientou Gándara.
Neste senso, a máxima representante da MNG cre que "é moi importante que os galeguistas e os socialdemócratas compartan organización, na mocidade e tamén no ámbito partidario, neste caso en Compromiso por Galicia”, polo que incita os socialistas a “reflexionar cal é verdadeiramente o seu sitio”.
