Asturias obriga a Rajoy a esquecer a lei anti bipartitos que prometera en Galicia

Rajoy, con Feijóo nun mitin en Galicia © PPdeG

"Dobre de publicidade, dobre de gasto” e  “moita máis xente facendo normas para jorobar á xente”. Poucos días antes das eleccións municipais do pasado 2011, o actual presidente do Goberno central, Mariano Rajoy, definía deste xeito os gobernos de coalición durante un mitin en Santiago para apoiar a candidatura de Gerardo Conde Roa á alcaldía da capital de Galicia. Ante os entregados asistentes a unha cea mitin, un Rajoy que xa se vía en La Moncloa proclamaba que "os bipartitos e tripartitos son moi caros e ineficaces". Por iso, lanzaba unha promesa que foi acollida con entusiasmo pola parroquia popular galega: "vou promover un cambio" da Lei Electoral "para facer o que acontece no resto de países de Europa e o que gañe, goberne".

Menos dun ano despois daquel acendido compromiso, o veredito ditado polas urnas o pasado domingo en Asturias semella vir de enviar ao caixón de asuntos incumpridos a reforma electoral para deixar fóra da lei as coalicións. Tras dez meses de Goberno do ex ministro Francisco Álvarez-Cascos, os populares enfrontábanse por segunda vez á súa escisión, Foro Asturias (FAC), e nin uns nin outros lograron a confianza maioritaria da cidadanía asturiana. En primeiro lugar situouse o PSOE, con case 160.000 votos, o 32% do total, e 16 escanos -un máis que en 2011-. Mentres, o partido de Álvarez-Cascos deixou polo camiño tres deputados, quedando con 13, e o PP quedou cos dez que tiña, aínda que cuns 12.000 votos menos. Malia a estes resultados, as palabras dos líderes de FAC e PP na noite electoral permiten concluír que ambas formacións tentarán fiar o que os populares consideraban hai poucos meses como "un pacto de perdedores".

Rajoy vía nos bipartitos "dobre de gasto" e "moita xente facendo normas para jorobar" a cidadanía

Nesta liña, despois de que Álvarez-Cascos asegurase ante os seus partidarios que agora o PP e mais el están "condeados a entenderse" porque agora unha "abstención" dos seus ex compañeiros equivalería a un goberno do PSOE, a candidata popular, Mercedes Fernández, Cherines, recollía o ofrecemento entre un aire de derrota no seo do seu partido. Fernández, malia a admitir que lograra uns resultados en absoluto "satisfactorios", anunciaba a súa intención de "poñerse a traballar" coa "disposición de buscar o interés xeral" ou, o que é o mesmo, un pacto do "centro-dereita" en Asturias. Desde Madrid, a secretaria xeral do PP, María Dolores de Cospedal, confirmaba que o seu partido ten "disposición ao diálogo e ao consenso" coas forzas "diversas" da nova Xunta Xeral do Principado.

Así as cousas, na formación que goberna España e Galicia o revés electoral de Asturias impedirá axitar a bandeira da lista máis votada mesmo en Andalucía, onde o desgaste do PSOE e a abstención lle serviu a Javier Arenas para gañar escanos malia perder votos a respecto das autonómicas de 2008. Ademais da promesa, semella que tamén ficarán esquecidas, cando menos ata a campaña dos comicios galegos, as proclamas que Rajoy lanzaba con entusiasmo ao carón do presidente da Xunta na etapa en que Alberto Núñez Feijóo constituía a única referencia no PP no que a baronías autonómicas se refire. Cando menos no caso asturiano, os bipartitos formados por partidos que non lograron ser a lista máis votada deixarán de ser para o PP un exemplo de "desunión, sen proxecto claro" e co "dobre de gastos", todo para impedir que "quen gane, goberne".

Rajoy, con Feijóo nun mitin en Galicia © PPdeG
Álvarez-Cascos valora os resultados do 25-M © Foro Asturias

Despece

  • O presidente di que "nada cambia" nunha visita con aire preelectoral

    A casualidade ou a enxeñería das axendas oficiais quixo que o presidente da Xunta fose protagonista de tres actos con aire preelectoral na primeira xornada tras as eleccións asturianas e andaluzas. Alberto Núñez Feijóo comezou o día na localidade ourensá de Vilamarín, visitando un centro de saúde xunto á conselleira de Sanidade. Aínda que o acto non se trataba dunha inauguración, o propio Goberno galego informou horas antes de que Feijóo prevía "saudar o persoal do centro" e "descubrir unha placa conmemorativa da súa visita". Xa pola tarde, o xefe do Executivo cambia o centro de saúde ourensán por un cento sociocomunitario en Santiago -os antigamente coñecidos como clubs de xubilados-, dende o que se emite un programa especial da Radio Galega, no que está incluída a súa intervención.

    Foi en Vilamarín onde o presidente valorou o acontecido en Asturias e Andalucía e a influencia dos comicios desas dúas autonomías no calendario electoral galego. "Nada cambiou", asegura Feijóo, cuxo calendario, asegura, só contempla "seguir traballando conforme ao programa" previsto. Nesta liña, e malia tratarse dun acto institucional, o líder popular abonda no ambiente preelectoral trazando os seus "obxectivos" para os comicios: "revalidar o Goberno" e "ampliar a maioría do PP no Parlamento". Para isto, di, será necesario "moito traballo", "dar explicacións", "moita humildade" e "moito compromiso e audacia". En calquera caso, di, aos "intereses de Galicia" non lles afecta "que se producisen eleccións en dúas comunidades autónomas esta fin de semana".

    Feijóo, nunha visita ao centro de saúde de Vilamarín © Xoán Crespo

  • Pachi ve o presidente "fervendo" e Guillerme coida que o ascenso do PP "freou en seco"

    O relativo picazo do PP nos comicios andaluces e asturianos non pasou desapercibido nas filas de PSdeG e BNG. O feito de que en Andalucía Javier Arenas non lograse a maioría absoluta e mesmo perdese votos mentres en Asturias os populares non pasaron de ser terceira forza política fai que socialistas e nacionalistas diagnostiquen que as reformas de Mariano Rajoy xa lle pasan factura aos conservadores nas urnas. "O período de graza da dereita comeza a esgotarse", coida o secretario xeral do PSdeG, Pachi Vázquez, en cuxa opinión a cidadanía "comeza a responsabilizar o PP dunha serie de ataques". Isto, di, fai que "a cabeza do presidente" e do Goberno galego estean xa "literalmente fervendo".

    Alberto Núñez Feijóo, coida Vázquez, "debe estar dándolle voltas a que teñen que facer" e bota  man da retranca para "axudarlles": "O que teñen que facer é gobernar, non converter isto nun elemento calculista nin tacticista; que se entere dos problemas dos galegos e os resolva", pero "tamén lle digo que se non se sente con forzas para sacar adiante este país, que deixe paso, que é o que ten que facer".

    Mentres o PP "queda clavado" en Andalucía, Pachi Vázquez observa o comezo dun "xiro á esquerda" do que Galicia "debe tomar nota" nuns comicios que os socialistas non descartan que cheguen adiantados. Se isto acontece, di a secretaria de promoción económica do PSdeG, Carmen Gallego, o partido estará "preparado" para afrontar unhas eleccións que Feijóo fixará rexéndose só por "criterios de vantaxismo" político, afirma.

    Esa análise de Gallego compártea tamén o portavoz nacional do BNG. Guillerme Vázquez amósase "convencido" de que a decisión de fixar a data electoral será tomada dende o Goberno galego "pensando en clave exclusivamente partidista, no momento en que a eles lles pareza que os pode beneficiar máis". "Nós estamos preparados para o anticipo electoral", subliña o nacionalista, nun contexto no que, como o PSdeG, tamén ve "freada en seco" a "onda ascendente do PP", unha circunstnacia que se debe "basicamente á política do Goberno de Rajoy".

    Se ben considera "moi presuntuoso" considerar "que fórmulas concretas" de Goberno se van producir tras os comicios do pasado domingo, a Guillerme Vázquez non lle estraña que o PP forme un bipartito despois de criticalos con dureza en Galicia. "O PP leva toda a vida dicindo unha cousa e facendo a contraria, non ten nada de novidade", asegura. "A lista mías votada, cando lle convén, transfuguismo, cando lle convén", exemplifica.

    Pachi Vázquez, nun acto do PSdeG CC-BY-NC-SA PSdeG

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza