"Vimos de ver como Televisión Española firmou un convenio coa Generalitat para a creación dun canal xeneralista en catalán e vemos significativo que este compromiso se estenda a todas as linguas oficiais", salienta Valentín García na constitución do novo Consello das Linguas Oficiais do Estado
O pasado outubro botou a andar La 2 Cat, a canle de Televisión Española coa programación maioritariamente en catalán (un 70% de inicio) baixo o lema La que parla com tu, "a que fala coma ti". A corporación estatal encadrou este lanzamento nun incremento do compromiso cos idiomas oficiais do Estado diferentes do castelán. E, dende Galicia, as voces que apostan por máis contidos en galego en TVE, caso d'A Mesa pola Normalización Lingüística-, sinalaron La 2 Cat como modelo tamén para o noso país nun contexto no que, en datas recentes agradeceron que o actual presidente "comece a cumprir compromisos" a respecto da nosa lingua.
A posibilidade dunha canle televisiva en galego alén das dúas da TVG pairou este pasado luns en Donostia durante a constitución do novo Consello das Linguas Oficiais, o órgano estatal que substitúe o creado en 2007 polo Goberno de Zapatero -practicamente desactivado en tempos de Rajoy e que volveu funcionar nos últimos anos-. Así o evidenciou secretario xeral da Lingua da Xunta, Valentín García, representante do Executivo galego no encontro.
O novo Consello nace, ao abeiro dun Real Decreto ditado o pasado setembro, con novidades como a incorporación, en calidade de membros de pleno dereito, dos Gobernos das autonomías con linguas propias oficiais. Como representante galego, informa a Secretaría Xeral, García trasladou "a importancia de que os programas de xestión do Estado atendan á realidade plurilingüe" en eidos como a Xustiza, pero tamén na televisión.
O presidente da RAG, tamén presente no novo órgano, reclama que "se axilice a incorporación do galego" a RTVE, especialmente na canle infantil Clan
"Fíxose fincapé -destaca Lingua- na necesidade de que os idiomas oficiais coma o galego teñan unha maior presenza nas corporacións de radio televisión públicas". Neste sentido, destacou García, "vimos de ver como Televisión Española firmou un convenio coa Generalitat para a creación dun canal xeneralista en catalán e vemos significativo que este compromiso se estenda a todas as linguas oficiais".
O secretario xeral amosouse favorable a esta reivindicación nun contexto no que, di, o novo Consello pode ser tamén un "grande observatorio" no que "todos podemos achegar para que todas as linguas oficiais ocupen o lugar que merecen na vida pública". O "pacto pola lingua" que, di, ultima o seu departamento, encádrase tamén nesa dirección.
Nos compromisos de RTVE puxo tamén o foco na xuntanza o presidente da Real Academia Galega. Na súa intervención ante o Consello, informa a RAG, Henrique Monteagudo "solicitou que se axilice a incorporación do galego á oferta de RTVE, de maneira especial naquela dirixida ao público infantil a través de Clan TVE".
"A representación do ente público -agrega a Academia- confirmou que, tal como se anunciara o pasado mes de xaneiro, se está a traballar para cumprir con este compromiso". Coida a institución que "constitúe unha contribución ben relevante para frear a perda de galegofalantes nos primeiros anos de vida e que os nenos e nenas castelanfalantes se familiaricen coa lingua propia de Galicia". Monteagudo resalta, asemade, que as academias poidan ter asento no Consello.
O Goberno de España reivindica o seu "compromiso" co galego
Pedro Blanco, delegado gobernamental en Galicia, reclama á Xunta "máis implicación e ambición nas políticas lingüísticas"
Dende Galicia acudiu tamén á estrea do novo Consello o delegado do Goberno de España, Pedro Blanco. "Imos seguir traballando para que falar galego sexa un exercicio pleno de liberdade de dereitos lingüísticos recoñecidos e garantidos", mantén nun contexto no que, asegura, ese "compromiso" se "materializa en medidas concretas" como permitir o uso dos idiomas oficiais alén do castelán no Congreso, o apoio económico á Real Academia galega ou a achega de 2 millóns de euros de fondos europeos de recuperación ao Proxecto Nós.
O órgano que agora bota a andar, agrega Blanco, concibe o galego "como un motivo de unión e non de división" e por iso, di, o Goberno de España "reclama á Xunta máis implicación e ambición nas políticas lingüísticas". "A situación actual do galego é preocupante", especialmente entre a mocidade, resalta, e por iso cómpre "traballar conxuntamente para que o galego teña o espazo e respecto que merece".
