Baltar agasallou á filla de Adolfo Domínguez cunha actuación da Banda de Gaitas pola súa voda

Real Banda de Gaitas da Deputación de Ourense © Real Banda de Gaitas da Deputación de Ourense

A Real Banda de Gaitas da Deputación de Ourense actuou gratis na voda da filla do deseñador ourensán Adolfo Domínguez o pasado 30 de xullo no pazo de Oca na Estrada. O propio ex presidente da Deputación, José Luis Baltar, contestou por escrito ao grupo socialista que “efectivamente é certo que un grupo de membros da Real Banda de Gaitas actuaron en dita voda”.  A resposta feita por escrito e comunicada o pasado 18 de xaneiro engade que “o custo da actuación foi inexistente para a Diputación Provincial, asumíndose todos os gastos da actuación por parte do solicitante”. Segundo a versión de Baltar “a Banda de Gaitas pode realizar actuacións a solicitude de entidades privadas, sempre e cando os solicitantes asuman integramente o custo da actuación  e non interfira coa programación  de actividades programadas pola Real Banda de Gaitas”.

Porén, e en vista de que Adolfo Domínguez asumiu os custes, o grupo Socialista solicitou a factura da actuación para comprobar que o empresario particular abonara os gastos que supoñen o desprazamentos de persoas e equipos. Baltar volveu responder por escrito, o 20 de xaneiro alegando que “non existe ningunha factura de dita actuación, polo que non é posible atender a súa petición”.

Os socialistas tamén cualifican de irregular este procedemento e entenden que o ex presidente concorre en contradicións ao afirmar “nun primeiro momento que Adolfo Domínguez correra cos gastos e logo sinalar que non existe ningunha factura”.

Segundo distintos testemuños recollidos por Praza entre técnicos en dereito administrativo “no caso de que se prevea a actuación a petición de particulares o que corresponde é que dita intervención se someta ao previo pago dunha taxa ou prezo público, segundo corresponda,  a través do cal compénsanse os gastos  derivados da mesma (transporte, emprego de instrumentos e a parte do tempo correspondente ás horas empregadas na actuación)”. As explicacións dos especialistas van máis aló ao sinalar “se na regulamentación da banda non existe una disposición que prevea a prestación do servizo a petición dos particulares, ou existindo, non se liquida e non se esixe o pagamento da taxa ou prezo público, estaríase facendo un uso incorrecto dos recursos públicos e incumprindo o réxime legal aplicable aos ingresos das administracións locais e provinciais”.

Os socialistas tamén cualifican de irregular este procedemento e entenden que o ex presidente concorre en contradicións ao afirmar “nun primeiro momento que Adolfo Domínguez correra cos gastos e logo sinalar que non existe ningunha factura”. Tamén entenden que “ao final quen corren cos gastos de este agasallo son os cidadáns da provincia de Ourense”.

A Real Banda de Gaitas da Deputación de Ourense, no enterro de Manuel Fraga, en Perbes Dominio Público Praza Pública

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.