Besteiro sitúa nas eleccións municipais o inicio da "recuperación" do PSdeG

Congreso extraordinario do PSdeG CC-BY-NC-SA PSdeG

"Non vos estou a propoñer empezar de cero, propóñovos empezar de novo. Sumar dentro, para sumar fóra". Con esta frase definiu José Ramón Gómez Besteiro o inicio da que pretende ser unha nova andaina no socialismo galego. O vencedor das primarias socialistas celebradas o pasado 7 de setembro, foi ratificado este domingo como secretario xeral do PSdeG co 95% dos votos dos delegados do congreso extraordinario. Naquela consulta, máis de 5.500 afiliados (o 77% dos que votaron) apoiaran o presidente da Deputación de Lugo. Nesta xornada, 520 dos 549 compromisarios que exerceron o seu dereito a voto déronlle o apoio á súa candidatura.

"A recuperación do PSdeG comezará polos concellos nas vindeiras muncipais", dixo Besteiro

"Volve o PSdeG", aventurou Besteiro, que cre que "o vindeiro éxito" do socialismo galego "pasa por recuperar o goberno deste país". "Propóñovos empezar de novo, sumar dentro e sumar fóra", asegurou o novo secretario xeral, que cre que "a recuperación" do partido comezará "polos concellos nas vindeiras municipais". Precisamente, a nova executiva proposta e aprobada polo novo líer socialista encheuse de alcaldes nos seus postos clave. Ata seis rexedores compatibilizarán o seu labor municipal co do partido.

Malia que había 607 delegados con dereito a voto, non todos acudiron a votar nun congreso no que 29 persoas optaron polo voto en branco. Un amplo e pechado aplauso do plenario recibiu o resultado destes comicios internos nun Congreso do que sairá elixida número dous do PSdeG a militante socialista da agrupación compostelá Pilar Cancela, segundo adiantaba  Europa Press.

Besteiro prometeu "entrega, traballo e decisión" para facer do PSdeG "a única alternativa real de goberno" fronte á dereita. Ademais, -tras agradecer o labor de Pachi Vázquez- apostou por un partido "máis dinámico, máis democrático e máis transparente". "A primeira grande aposta nesta nova etapa debe ser elevar o nivel de compromiso e aumentar a nosa base social", insistiu o novo secretario xeral, que nas súas palabras apostou tanto por fortalecer a formación como pola pelexa para acabar co goberno do PP na Xunta. "O PSdeG volve e volve para se quedar", dixo logo na clausura.

"Tócanos frear a dereita máis fría, máis dura e máis insensible dos últimos trinta anos", proclamou o novo secretario xeral

Así, cargou contra un partido "que nin tan sequera é capaz de condenar con contundencia o franquismo" e centrouse no reto da "terceira xeración dos socialistas galegos": "Tócanos frear a dereita máis fría, máis dura e máis insensible dos últimos trinta anos, á que lle dá igual que os mellores anos para Feijóo sexan os peores para os galegos".

"O plan de Feijóo para Galicia non se basea na austeridade, baseáse na precariedade; unha Galicia precaria en emprego, no mar, no campo, na industria, na paixaxe e na lingua", engadiu Besteiro, que cre que "cada día que Feijóo goberna, Galicia bórrase un pouco máis do mapa. "Os socialistas non imos permitir que os galegos sigan soportando un presidente que pretende ser irresponsable do seu propio desastre", dixo.

"Non imos falar do que se quere ouvir, senón do que se debe de escoitar", finalizou o líder do socialismo galego, que rematou clamando "volve o PSdeG!", logo de insistir en prometer "enerxía e traballo" e lembrar que, "malia que algúns deron o partido por roto", a formación "está máis viva que nunca".

Por outra banda, no congreso Besteiro conseguiu xuntar case todos os secretarios xerais do PSdeG, desde Rodríguez Pardo até Emilio Pérez Touriño, pasando por Francisco Vázquez e Antonio Rodríguez, ademais de Fernando González Laxe, presidente da Xunta a finais dos anos 80.

HABERÁ AMPLIACIÓN

Gómez Besteiro, entre varios delegados, no congreso do PSdeG CC-BY-NC-SA PSdeG

Despece

  • Pachi Vázquez marcha pedindo a Ferraz que "tome exemplo" das primarias do PSdeG

    O que aínda era secretario xeral do PSdeG, Pachi Vázquez, despediuse do seu cargo para pedir a dirección federal do seu partido que tome "exemplo" das primarias celebradas en Galicia para logo amosar o seu "agradecemento" á militancia. "Despídome coa convicción de telo dado todo, co orgullo de ser secretario xeral dun gran partido e, sobre todo, co compromiso de seguir traballando estea onde estea polo meu partido e por Galicia", asegurou entre aplausos.

    "Agora tócame arrimar o ombreiro, con lealdade, disciplina e compromiso", dixo Vázquez

    Ademias, destacou que "como militante, deputado e membro da executiva federal", traballará "con lealdade ao servizo da nova dirección". Así, dirixiuse a Besteiro para remarcar que recibiu "un apoio masivo" das bases do partido e, por iso, agora "toca arrimar o ombreiro" con "lealdade, disciplina e compromiso". "Eu, o primeiro", prometeu.

    A continuación, insistiu en que marcha coa "satisfacción" de que todas as súas decisións tiñan como obxectivo "facer o mellor para Galicia e para o partido". "Habería de todo, unhas mellores e outras peores, pero non teñades dúbida de que sempre, sempre, sempre, tentamos facer o mellor para Galicia e para o partido", sostivo Pachi Vázquez.

    O xa ex secretario xeral pediu ao PSOE que "mire o exemplo de Galicia" e aplique as primarias a todo o partido

    Pero Vázquez quixo marchar deixando unha clara mensaxe á dirección do PSOE en Madrid. "Que mire o exemplo de Galicia", animou, convencido de que a "implicación" de todos os militantes nos procesos de elección interna é "algo bo". Por iso, pediu que a Confererencia Política do partido a nivel federal, prevista para o próximo mes de novembro, "abra o debate" sobre esta fórmula "para toda España".

    Malia a forte ovación recibida, nos corredores do congreso algúns militantes distribuían chapas nas que se podía ler Tanta paz leves como descanso deixas.

    Pachi Vázquez, tras o seu discurso de despedida CC-BY-NC-SA PSdeG

  • Besteiro renova nun 96% unha executiva en clave municipalista

    José Ramón Gómez Besteiro deu a coñecer este domingo quen serán as persoas que o acompañarán na súa tarefa de dirixir o PSdeG. A nova executiva foi aprobada polo 68% dos votos dos delegados. Os primeiros postos serán, ademais de para a santiaguesa Pilar Cancela, que se fará cargo da Organización, para o alcalde das Pontes, Valentín González Formoso, que asumirá a Secretaría de Política Municipal. Cancela, que foi directora xeral de Relacións Laborais no Goberno de Emilio Pérez Touriño, substituirá agora a Pablo García, número dous na formación socialista ata este domingo.

    A nova executiva presenta un grao de renovación de arredor do 96%, xa que o novo secretario xeral dos socialistas mantén no seu equipo tres integrantes da dirección de Pachi Vázquez. Guillermo Meijón será o responsable de Relacións Institucionais, Xaime Barreiro de Economía ou Iván Puentes de Dereitos Cidadáns e Movementos Sociais.

    Pero ademais, nos 29 membros da nova dirección -antes había 46-, hai un enorme peso do poder municipal. Seis dos responsables de cada unha das áreas de xestión son alcaldes. Marcos Blanco, rexedor de Ribadavia; Ramón Alonso, de Entrimo; José Manuel Pequeño, de Dumbría; ou Manuel Mirás; de Oroso. Agustín Fernández, alcalde de Ourense, será o responsable de Política Fiscal e Financeira, mentres que Valentín Formoso, rexedor das Pontes, será o número tres do partido segundo se desprende da orde na lista facilitada polos socialistas.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza