Caballero e Montoro acordan que os concellos poidan pagar servizos á veciñanza cos aforros de cada ano

Caballero, durante a reunión en Facenda con Montoro CC-BY-SA eldiario.es

Hemeroteca

O ministro de Facenda, Cristóbal Montoro, mostrouse este luns aberto a impulsar unha norma que permita ás entidades locais flexibilizar o reinvestimento do seu superávit "con rapidez", sinalando que o mecanismo que axilizaría este reinvestimento sería un decreto lei. No entanto, Facenda reitera que os investimentos teñen que fixarse ao concepto da sustentabilidade financeira e respectar as competencias de cada administración.

A intención é que as entidades locais poidan gastar os seus remanentes desde agora e até as eleccións locais de 2019

Segundo informou o ministro en rolda de prensa logo dunha reunión de máis de dúas horas co presidente da Federación Española de Municipios e Provincias e alcalde de Vigo, Abel Caballero, a intención é que as entidades locais poidan gastar os seus remanentes desde agora e coincidindo co calendario político que desemboca nas eleccións autonómicas e locais de 2019. Segundo aclarou o rexedor vigués, este permiso sería aplicable xa desde o mes de marzo. 

Do mesmo xeito, Montoro amosouse disposto a unha redefinición dese concepto de investimento financieramente sustentable e da regra de gasto, para "dotala de contido máis efectivo". A FEMP, pola contra, xa anunciou que enviará unha lista para aumentar os sectores nos que poder investir o superávit. 

Caballero, coa alcaldesa de Madrid, Manuela Carmena, e os rexedores de Valladolid e Mieres (Asturias), durante a xuntanza na FEMP © FEMP

Xuntanza de 300 concellos

Caballero agarda que o decreto estea en marcha "en quince ou vinte días"

Os resultados da xuntanza con Montoro foron trasladados por Caballero este martes nunha xuntanza da sede da FEMP aos representantes dun trescentos gobernos municipais de todo o Estado. "En quince ou vinte días", afirmou o rexedor vigués, "estará dispoñible" ese decreto, sobre o que as Administracións Locais van "estar vixiantes". Montoro, di Caballero, era "consciente" de que neste encontro ía haber "reunidos centos de alcaldes e alcaldesas representando a millóns de cidadáns" que, neste asunto, demostran unha "práctica unanimidade de opinión" malia seren de cores políticas diversas.

Entre a representación galega nese encontro figurou a edil de Facenda da Coruña, Eugenia Vieito, quen ve que a posibilidade de reinvestir os aforros do ano previo en investimentos financeirmaentoe sostibles é "un avance" , pero "insuficiente para resolver o problema do financiamento local". "Os concellos, especialmente aqueles que fan os deberes e teñen as contas saneadas, precisamos de medidas que solucionen os nosos problemas de financiamento", resalta Vieito, quen ve nestes "avances" un resultado da "presión dos concellos do cambio contra as limitacións no uso do superávit".

Eugenia Vieito e María Rozas, concelleiras de Facenda da Coruña e Santiago CC-BY-SA Concello da Coruña / Concello de Santiago

Concellos como A Coruña ou Santiago valoran o "avance", pero veno "insuficiente" e reclaman "poder decidir a que destinar os cartos segundo a capacidade e recursos" de cada municipio

Nun sentido semellante a concelleira de Facenda de Santiago, María Rozas, concorda en que o acadado é un paso adiante, aínda que escaso. "Pedimos que nos devolvan a autonomía e que cada Concello poida decidir, segundo a súa capacidade e recursos, a que destinar eses cartos", resalta.

No caso de Galicia, os concellos pecharon o ano 2016 con case 490 millóns de remanente, mentres que no conxunto do Estado o aforro chegou daquela aos 7.000 millóns. Falta que se presenten neste próximo mes de marzo os datos pechados de 2017.

Despece

  • O pleno da Deputación de Lugo aproba o plan único de financiamento dos concellos por unanimidade

    A unanimidade do pleno da Deputación de Lugo deu este martes luz verde ao plan único da institución, isto é, ao sistema de financiamento dos concellos lucenses a través da institución provincial, dotado desta volta con 21 millóns de euros. As achegas, resalta a Deputación, van dende os 500.000 euros aos concellos de maior dimensión, como Lugo, Viveiro, Monforte ou Vilalba, ata os 200.000 euros que reciben os municipios máis pequenos.

    Darío Campos, presidente da Deputación, insta a Xunta e Goberno central a "tomar nota" e "distribuír os fondos de maneira obxectiva" no canto de manter "abandonada a nosa provincia"

    Criterios como a poboación, a superficie, o número de núcleos nos que se distribúen os habitantes ou a taxa de envellecemento son algúns dos criterios de distribución dos fondos dun plan que financia "obras de mellora, emprego, benestar, turismo, deporte e cultura". Os concellos, pola súa banda, deben achegar "un mínimo do 50%" dos fondos que reciben a novos investimentos e 1,8 millóns van ao servizo de atención a persoas dependentes que "a Deputación presta a 1.800 maiores que non atende a Xunta".

    Para o presidente da Deputación de Lugo, Darío Campos, a aprobación unánime deste plan é mostra da "política con maiúsculas" á que, afirma, se comprometeu cando chegou ao cargo, agora achegando 21 millóns que "non serán os únicos fondos" que reciban os concellos durante 2018 dende a institución provincial. Este acordo, subliña, prodúcese mentres outras administracións "teñen abandonada a nosa provincia, como a Xunta ou o Goberno central". "Que tomen nota, que fagan tamén políticas con maiúsculas e distribuír os fondos públicos de maneira obxectiva".

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza