Tras unha inspección da Garda Civil pola existencia de residuos de construción nun predio, o político popular emitiu unha suposta autorización para a que non tiña competencias
A Audiencia Provincial da Coruña vén de condenar, nunha sentenza con data deste luns feita pública este martes, a quen foi alcalde de Coristanco entre 1991 e 2015 polo PP, Antonio Pensado, a sete anos de inhabilitación para emprego ou cargo público por cometer un delito de prevaricación ao autorizar, en 2012, a unha empresa a almacenar residuos de demolición e construción nun predio.
O tribunal, que tivo en conta a atenuante de dilacións indebidas, destaca que a resolución do daquela rexedor municipal foi “arbitraria e contraria á legalidade” e impuxo a mesma pena, como cooperadores necesarios do delito de prevaricación, aos tres irmáns administradores da compañía beneficiaria. Os xuíces aseguran que o ex-alcalde actuou “concertadamente” cos tres empresarios “para tratar de deixar sen efecto” as sancións da Xunta polo depósito de materiais non autorizado.
Os maxistrados din que o ex-alcalde actuou “concertadamente” con tres empresarios “para tratar de deixar sen efecto” as sancións da Xunta polo depósito de materiais non autorizado.
Os maxistrados consideran que era “evidente” que a autorización “se apartaba de calquera legalidade vixente” e que esa circunstancia era “coñecida por todos os acusados, debido a que no ano 2007 xa houbo denuncias por provisión de material na mesma leira e un expediente sancionador da Xunta”. Os xuíces explican que, segundo declararon os axentes da Garda Civil e do Seprona que se desprazaron ao terreo, nel había “múltiple material que estaba amoreado”. Tras a inspección, un dos tres empresarios, segundo consta na resolución, foi ao Concello para conseguir “un papel para acreditar que tiñan autorización”. Por iso, o ex-alcalde emitiu un escrito, coa súa firma e co selo do Concello, que carecía “de calquera requisito que o permita entender axustado á legalidade”, segundo os xuíces, os cales salientan que a competencia para autorizar esa provisión de materiais é da Consellería de Medio Ambiente.
Ademais, o tribunal sinala que “tampouco existe ou consta expediente algún relativo a dita autorización” e recalca que os acusados “coñecían a inxustiza da resolución, que precisamente trataba de liquidar esa situación na leira, que xa se producira tempo atrás, e xustificar ante a inspección realizada o contar coa correspondente autorización”.
Na sentenza, a Audiencia tamén absolve ao ex-alcalde dos demais delitos de prevaricación que lle imputaba o Ministerio Público, así como do de falsidade, e, aos empresarios, dos demais delitos de prevaricación e do de tráfico de influencias. Así, entende que non quedou acreditado que o daquela rexedor municipal tratase de favorecer aos tres irmáns empresarios, aos que supostamente o unía unha amizade, á hora de adxudicar obras. Na sentenza, os xuíces aseguran que o procedemento negociado sen publicidade polo que se contrataron os traballos “se axustaba ao contemplado na Lei de Contratos do Sector Público 2007 e 2011”. Ademais, recalcan que “ningunha incidencia xurdiu coas distintas administracións das que procedían os plans” dentro dos cales se executaron as obras.