Segismundo García asegura que clausura a factoría da histórica en Cervo pola "dificultade para respectar e acometer a inxente normativa" tras un control que detectou unha trintena de deficiencias nas instalacións
Enésima convulsión na historia de Sargadelos. Quen dende principios de século é o seu máximo accionista, Segismundo García, anunciou outro dos seus controvertidos movementos. Asegura que se dispón a pechar en Cervo a principal fábrica dunha empresa que non so é tal, senón tamén todo un símbolo do país e do galeguismo, historia industrial, artística e cultural de Galicia.
Segundo avanzou o xornal El Progreso, García anunciou o peche este 2 de abril de 2025 ao persoal do grupo en Cervo e Sada, máis 200 persoas, mais sen aclarar se prevé tamén clausurar a factoría sadense. E non o xustifica en problemas económicos coma os que a compañía arrastrou no pasado —o propio dono vén destacando nos últimos anos a boa marcha financeira de Sargadelos, atribuíndoa á súa xestión—. Senón para non cumprir con requirimentos da Inspección de Traballo.
"Procedemos ao peche da planta de produción con data de hoxe mesmo" ante a "dificultade para respectar e acometer a inxente normativa vixente", mantén García despois de que, semanas atrás, a Inspección detectase máis dunha trintena de deficiencias nas instalacións e instase a arranxalas. Dado que as instalacións de Sargadelos na localidade mariñá son Ben de Interese Cultural, di o propietario, é "imposible" cumprir cos prazos e por iso prefire pechar.
O anuncio está arrodeado de incógnitas. Entre outras cuestións, porque existen precedentes de ameazas de peches por parte de García para enfrontarse a conflitos laborais
O propio Segismundo García dá por feito nas súas comunicacións deste mércores á Inspección e ao persoal que a decisión de pechar lle implicará asumir diversos gastos "de todo tipo", alén de preitos. Afirma que "esta dirección nin valora" o diñeiro que previsiblemente vai perder como consecuencia da súa reacción á inspección que supuxo para a compañía unha multa de 5.000 euros.
O anuncio está, en calquera caso, arrodeado de incógnitas. Entre outras cuestións, pola propia maneira de actuar de García e precedentes de ameazas de peche pola súa banda para, por exemplo, enfrontarse a reivindicacións sindicais. E pola evidencia de que a execución dun peche patronal non é unha operación mecánica, dependente unicamente da vontade do propietario.
A Xunta advirte a Sargadelos de que o expediente de Inspección "aínda non é firme" e que "ningunha" das medidas propostas "abocan ao peche da planta"
De feito, horas despois do anunciou e a través dun comunicado, a Xunta lembrou que Inspección de Traballo "actúa para garantir o cumprimento das medidas de riscos laborais, que son unha obriga para todos os centros de traballo". "O expediente mencionado pola propiedade da empresa atópase nunha fase inicial, aínda non é firme e implicaría unha posible sanción de 5.000 euros ademais da corrección de determinadas eivas. Ningunha destas medidas abocan ao peche da planta", advertiu o Goberno galego.
"O cumprimento da lexislación de seguridade laboral non é unha traba para a actividade dunha empresa, senón unha garantía para que esta poida desempeñarse nunha contorna segura e axeitada para a saúde dos traballadores, neste caso e en calquera outro", insistiu a Xunta, nun claro comunicado no que deixa claro o seu rexeitamento ao anuncio feito polo dono da empresa, á que tamén tende a man.
O Goberno galego advirte que "o cumprimento da lexislación laboral non é unha traba para a actividade da empresa, senón unha garantía"
Así, a Xunta di "entender" que "a adaptación a determinados requisitos pode supoñer un reto, especialmente en instalacións de alto valor patrimonial como as de Sargadelos, que son BIC desde 2014". Ante iso, aclara, amosa a súa "disposición para colaborar e asesorar na procura de solucións que permitan manter e seguir impulsando a actividade industrial dentro do cumprimento da normativa".
O Goberno galego advirte de que estamos ante un "referente industrial e cultural" e "confía" en que, "co esforzo de todas as partes, se atopen vías que permitan a súa continuidade, garantindo o mantemento dos postos de traballo, o cumprimento da lexislación vixente e a conservación e promoción do patrimonio cultural".
Máis ca unha empresa, un emblema do país
O eventual peche de Sargadelos vai moi alén do ámbito estritamente empresarial ou do seu nada desprezable impacto económico, especialmente na Mariña. Sargadelos segue sendo, malia todos os avatares sufridos nas últimas décadas, un verdadeiro emblema do país.
Mesmo coa deriva política e simbólica emprendida baixo a xestión de García —mentres economicamente a empresa deixaba os anos de despedimentos e concursos de acredores e pasaba a claros beneficios, con máis de 400.000 euros en ganancias no 2023, segundo Economía Digital—, Sargadelos segue sendo sinónimo de Galicia. Nas súas pezas cerámicas, mais tamén na herdanza material e inmaterial que custodia.
Mesmo coa deriva política e simbólica baixo a xestión de García, Sargadelos seguiu atesourando o inxente legado de Díaz Pardo e segue sendo sinónimo de Galicia nas súas pezas cerámicas e na herdanza material e inmaterial que custodia
Sargadelos é sinónimo de Antonio Raimundo Ibáñez, o ilustrado que a principios do século XIX abriu unha fábrica de louza na parroquia cervense que dá nome ao seu marquesado. Pero, sobre todo, atesoura o inxente labor desenvolvido dende finais da década de 1940 por Isaac Díaz Pardo. Polo reinicio da produción cerámica, mais tamén por todo o traballo xerado en torno ao Laboratorio de Formas, polo lugar de encontro do legado galeguista e republicano, polo contributo á xeración dunha estética nacional galega que chega aos nosos días.
Os enfrontamentos con Díaz Pardo e a súa familia, precisamente, marcaron o inicio do dominio en Sargadelos de Segismundo García. O anuncio de peche chega, paradoxalmente, vinte e catro horas despois de que o Día das Artes Galegas rendese homenaxe ao labor creativo de Díaz Pardo, pero tamén ao seu papel como "exemplo ético".
