A campaña chámase As nosas pagas son de lei e presentouse este venres en Ourense, onde Xosé Manuel Pérez Bouza, Sandra Araúxo e Rafael Cuiña rexistraron unha reclamación administrativa e animaron á cidadanía a facer o mesmo, a partir dun modelo que veñen de colgar na páxina web de Compromiso por Galicia.
Pérez Bouza lembrou que o Estatuto Básico do Empregado público establece como retribucións básicas “o soldo, os trienios e as pagas extras”
Pérez Bouza salientou que se trata dun "dereito das e dos traballadores” e lembrou que o Estatuto Básico do Empregado público establece como retribucións básicas “o soldo, os trienios e as pagas extras”, polo que a aprobación do Real-Decreto Lei 20/2012 do 13 de xullo, na que se establece entre outras medidas a de eliminar a paga extraordinaria de decembro para os traballadores e traballadoreas das diferentes adminstracións públicas, "está contradecindo uns dereitos que en última instancia deben prevalecer".
Pola súa banda Rafael Cuíña engadiu que a paga extraordinaria é un dereito, “a pesares de que algúns o queiran vender coma un privilexio”. Cuíña afirmou que os traballadores e traballadoras son dos máis afectados pola crise, polo que os gobernos o que deben facer é “amparar os seus dereitos, non agredilos”. “Eses traballadores e traballadoras teñen nome e apelidos e son os que educan os nosos fillos ou salvan vidas, e cumpren unha función fundamental para o que o Estado de Benestar funcione”, concluíu.