Non houbo sorpresas, e o Consello Nacional de Compromiso por Galicia refrendou as propostas e anuncios realizados nos últimos días pola organizacións. En primeiro lugar reiterou a oferta de coalición electoral a Anova que o xoves fixo pública Xoán Bascuas, co obxectivo de conformar, segundo o propio Bascuas, unha oferta “nidiamente galega e progresista”. Houbo un alongado debate sobre outras posibilidades de pacto máis amplas, nas que entraría tamén Esquerda Unida, pero finalmente a maioría impúxose. Bascuas defendeu que "a situación que estamos a vivir require de respostas audaces", que permitan unha alternativa "realista" ao PP e á vez "posibilitar un proxecto político propio de longo percorrido coa aspiración de gobernar este País”.

Así mesmo, aprobouse o procedemento para a convocatoria e realización de primarias para a elección dos candidatos de Compromiso (ou da coalición Compromiso-Anova se finalmente chegase a producirse). As votacións, á espera da resposta da formación de Beiras, terían lugar o vindeiro domingo 9 de setembro e serían "abertas a militantes, simpatizantes e cidadanía en xeral". Escolleríanse en primeiro termo os cabezas de lista e posteriormente á Presidencia da Xunta.

Escolleríanse en primeiro termo os cabezas de lista e posteriormente á Presidencia da Xunta

Bascuas salientou que a convocatoria de primarias “vai para adiante, porque ese foi o noso compromiso e non só falamos doutras formas de facer política, se non tamén as aplicamos”. En calquera caso, tanto a data coma o procedemento estarían á espera dunha confirmación definitiva, que dependería da aceptación da oferta de coalición. Nese caso, sinala Bascuas, "habería que acordar certas regras de xogo”.

(HABERÁ AMPLIACIÓN)