En campaña: A esquerda apela ao "cambio posible" e o PP, a non confiarse

Feijóo, nun acto de precampaña en Ourense © PP

En campaña por quinta vez en dous anos, pero por primeira en catro, como corresponde, para renovar o Parlamento de Galicia. As forzas políticas galegas piden dende esta media noite o voto cara a unhas eleccións do 25S cuxo inicio de campaña vén marcado, como adoito, polo inquérito do Centro de Investigacións Sociolóxicas (CIS). Malia aos erros demoscópicos das últimas xerais e aínda que hai catro anos o propio CIS non atinase co número de escanos que tivo ningún dos grupos, o feito de que este estudo debuxe un PP coa maioría absoluta intacta mentres o resto de forzas se limitan a redistribuír os seus espazos condicionou as mensaxes dende ambas as bandas. Pola esquerda apélase a ilusión nun cambio posible. Pola dereita, a non caer nunha relaxación que poida derivar nun susto.

"No me creo nada", escribía pouco despois de coñecer a enquisa do CIS un relevante dirixente do PPdeG. Se algún temor existe nas filas conservadoras é que os 41 asentos que lles outorga a sondaxe leve a pensar no seu electorado que o obxectivo está feito. De aí que, pouco despois, dende o partido se axitase o temor a unha "alternativa liderada por Podemos" e non se perda de vista factores como que o 25S xa estará en marcha a vendima, de aí que o partido en Ourense estea a instar os profesionais do sector a votaren por correo. A mensaxe oficial foi verbalizada por Alberto Núñez Feijóo dende o atril do Consello da Xunta: "A terceira maioría absoluta consecutiva é un sono, pero os sonos, sonos son. Seguimos soñando pero as enquisas, enquisas son", dixo, antes de instar os seus a "traballar e non dar un balón por perdido".

"A decisión  que saia das urnas afectará á próxima década en Galicia", advirte o aspirante á reelección polo PP mentres na súa contorna a maquinaria electoral dirixe boa parte das olladas cara ao candidato de En Marea, Luís Villares, a quen veñen acusando de "insultar" a Feijóo mentres reiteran que carece de proposta ningunha para o país. Villares, precisamente, retruca á paisaxe debuxada polos conservadores afirmando que, "lamentablemente para o PP, os problemas de Galicia non se amañan con enquisas". Durante a precampaña, afirma, En Marea está a percibir unha "gran pulsión de cambio social e político" e "esa é a nosa forza para termos o mellor goberno posible".

O PP teima na mobilización das súas bases afirmando en que a absoluta non está feita

Ao "cambio posible" apela tamén o candidato do PSdeG. Despois de que o CIS situase os socialistas nun empate técnico con En Marea Xoaquín Fernández Leiceaga coida que sería un erro dar por feito que a foto do 25S será a que reflicte a "construción" da sondaxe, realizada sobre un momento moi determinado. "Máis alá das estimacións de voto, a competición está aberta" e está, ao seu xuízo, claro que "é posible o cambio en Galicia, que hai unha demanda de cambio que se vai expresar o día 25", sobre todo se "somos quen de convencer a elevada porcentaxe de indecisos". Nese caso, augura, "imos ter a oportunidade de construír unha política co liderado do PSdeG".

PSdeG, En Marea e BNG aseguran percibir ansias de cambio e lembran os erros anteriores do CIS

Fronte ás enquisas que "se utilizan para incidir no voto" a cabeza de cartel do BNG, Ana Pontón, esgrime o "optimismo e ilusión" que, asegura, vén detectando na precampaña. "O máis devaluado" no actual panorama político "son as enquisas", que nas últimas convocatorias "non acertaron nin unha" e por iso "a única que vale" é a que saia das urnas. No Bloque, asegura a nacionalista, existe confianza en seren "fundamentais" para "que haxa un cambio político real en Galiza" e "abrir un tempo novo".

Mentres a esquerda procura unha autotransfusión de folgos e fía o futuro a unha campaña que remate en sorpresa -xa sucedeu, lembran, en 2009 con beneficio para o PP, ou en 2012 con AGE como forza á alza-, na dereita procúrase non deixar marxe ningunha por cubrir. "A única seguridade dun goberno estable son os 38 escanos", isto é, a absoluta, reitera Feijóo, máis alá de dar por feito que se Ciudadanos lograse entrar no Parlamento, o apoiaría tal e como ofreceu Albert Rivera.

Leiceaga, este venres nun acto sobre cultura en Santiago CC-BY-NC-SA PSdeG
Luís Villares, nun acto de En Marea na Coruña CC-BY-NC-SA En Marea
Ana Pontón, candidata do BNG CC-BY-NC-SA BNG

Despece

  • Feijóo teima en que se presenta sen "siglas" e non pide o voto para "un partido"

    O candidato a recuncar na Presidencia da Xunta polo PP, Alberto Núñez Feijóo, iniciou a campaña do 25S do mesmo xeito en que lanzara a precampaña, procurando afastar a súa mensaxe da competencia entre forzas políticas que se dirime, precisamente, dende este venres e ata dentro de dúas semanas. No seu acto de inicio de campaña, na Coruña, Feijóo teimou en que concorre aos comicios sen "siglas" e mesmo deu en afirmar que non pide o voto para "un partido".

    O actual titular do Goberno galego, cabeza de lista dos conservadores por Pontevedra, proclamou ante unha pantalla co seu lema de campaña que "non se presenta como candidato dun partido" ou "cunhas siglas", senón "como militante de Galicia e presidente de todos os galegos". É por iso, asegura, que votarlle á súa formación non é promover "un partido con maioría nog oberno, senón un goberno da gran maioría dos galegos.

    Como vén sucedendo nas últimas semanas, o cabeza de cartel do PP asegura que a súa formación é a única garantía de que Galicia non caia na "ingobernabilidade, desgoberno e parálise" que, di, vive España dende as eleccións xerais. Só cunha maioría absoluta encabezada por el mesmo, conclúe, non se "interromperá" o "progreso do país, o da liberdade de falar no idioma que nos peta" ou o de sentirse "galegos e españois".

    O PP comezou a campaña cun mitin na Coruña CC-BY-SA PPdeG

  • Leiceaga presenta o PSdeG como "clave do cambio" en Galicia

    O candidato do PSdeG á Presidencia comezou a carreira electoral cun acto en Santiago dende o que erixiu o seu partido como "clave" para un posible cambio de goberno en Galicia. "O PSdeG é a forza motriz do cambio, é a clave para que se poida producir", mantén.

    Acompañado por cargos e candidatos do partido Leiceaga convidou a pensar o significado dunha eventual mudanza na Xunta. "Os socialistas -di- sabemos que o cambio é imprescindible para mellorar a sanidade, para xerar emprego, para reindustrializar Galicia, para xerar oportunidades e que a mocidade non teña que emigrar", exemplifica.

    Para todo isto, di, cómpre "un proxecto renovador na Xunta" que "faga uso de toda a potencia do noso Estatuto" e "devolva a exemplaridade pública fronte á mala xestión" do PP. "Temos un proxecto para a maioría social, temos experiencia de goberno" e por todo isto, conclúe, "somos a mellor alternativa ás políticas da dereita". E para isto, dende o liderado, asegura, "somos capaces de dialogar e pactar para facer avanzar Galicia".

    O PSdeG 'pegou' o primeiro cartel de Fernández Leiceaga en Santiago CC-BY-NC-SA PSdeG

  • Villares apela a "varrer" o PP da Xunta para construír "un país xusto"

    "Comezamos a enterrar sete anos funestos". É o augurio lanzado polo candidato de En Marea á Presidencia, Luís Villares, no primeiro acto da súa campaña electoral. Ao pé da Muralla de Lugo, circunscrición pola que Villares concorre ao Parlamento, o aspirante á xefatura do Goberno galego apela á fin da hexemonía do PP, a "varrer" os conservadores do poder como vía para "borrar e varrer" a "miseria" e dar paso a "un país xusto".

    "Un país de iguais, amable, que pode e quere ser outra cousa", di, é o propósito de En Marea, igual que o era das mareas municipais. Á vitoria destas candidaturas en diversos concellos, precisamente, apelou Villares para instar os seus a que aquela "primavera" non "remate". "É hora de dadr un paso máis" e acadar o Goberno galego, afirma, no canto de quen "non pode representar a Galicia" por representar tamén "o partido de Bárcenas, de Rato, de Soria" ou de "Iravedra, que se afanaba en carrexar anciáns con alzhéimer" en Lugo.

    "A decencia -proclamou- está proscrita no PP" e é por iso que Feijóo "disimula" o logotipo da formación nos carteis. No entanto, resalta, faino mentres "se pasea de ganchete con Baltar, ese sucio machista que pide sexo a cambio de enchufes; nós, coa violencia machista tolerancia cero e con Baltar e os seus cómplices, tolerancia cero". Tras sete anos co PP "desgobernando" os votos de En Marea, afirma, servirán para "botar a Feijóo" e "con el, virá tamén a fin de Rajoy".

    En Marea tivo o seu acto central de inicio en Lugo, por onde concorre Luís Villares CC-BY-SA En Marea

  • Pontón pide o voto de "quen confían en Galiza" para abrir "un tempo novo"

    Comezou "a conta atrás para abrir un tempo novo". Ante un gran mosaico cos lemas de campaña do BNG a candidata da formación soberanista á Presidencia, Ana Pontón, apelou na Coruña especialmente a quen "confían en Galiza" cara ao 25S. "É preciso ter confianza no país e exercer o poder político para o cambio real, no que o BNG será decisivo".

    O Bloque, asegura Pontón, é a candidatura clave para "poder construír unha Galiza de emprego e benestar social", obxectivo para o cal "non chega con derrotar a Feijóo, non basta con cambiar de caras". "Temos que facer algo tan revolucionario -afirma- como é confiar nas nosas propias forzas, como país e como pobo, decidir desde aquí o que nos convén para poñer o país a producir, xerar emprego e garantir o benestar".

    Por diante, afirma a nacionalista, quedan dúas semanas nas que o BNG realizará unha campaña "en positivo e de proximidade" na que integrantes das candidaturas e a militancia expliquen que representan unha forza política "fiable" e garantía de que as mudanzas no goberno non serán só "cosméticas". "Temos a oportunidade -asegura a candidata- de darnos un goberno cun proxecto de país para a maioría social". 

    O BNG apoiou a Ana Pontón cun gran mosaico na Coruña CC-BY-NC-SA BNG

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza