Esquerda Unida di ter recibido unha negativa dos socialistas á proposta de conformar unha fronte ampla esquerdas e afirma que “sabíamos que era difícil un cambio de actitude mais non quixemos renunciar a que rectificasen a súa deriva neoliberal". En consecuencia, Esquerda Unida chama a todos os simpatizantes do PSOE desencantados coas súas políticas a participaren na Syriza galega, pois segundo a coalición de esquerdas "vivimos tempos excepcionais que requiren actuacións excepcionais nos que a esquerda, máis que nunca, debe actuar conxuntamente para que rematen os ataques contra os traballadores e traballadoras e os recortes de dereitos contra a maioría social, porque está en xogo o modelo de sociedade, os dereitos sociais e ate a propia democracia".
EU di que “sabíamos que era difícil un cambio de actitude mais non quixemos renunciar a que rectificasen a súa deriva neoliberal"
A executiva nacional de EU considera que a negativa do PSdeG a formar unha fronte ampla de esquerdas contra o PP demostra "o seu nulo interese por transformar a situación actual de sufrimento que viven as familias traballadoras". Esquerda Unida di que a oferta ao PSOE inscribiuse nunha forma de actuar sen "apriorismos", e cun diálogo aberto "a todas as organizacións de esquerdas que pulen por rachar coa situación de inxustiza social e insustentabilidade medioambiental na que vivimos".
Esquerda Unida mantén en calquera caso o seu ofrecemento de diálogo "sempre que estean dispostos a rectificar a súa errática política" e afirma que deben ser os socialistas "os que decidan se queren formar parte da Syriza galega ou prefiren conformar o bloque sistémico co PP, ao estilo do PASOK".