Feijóo di non amosar os contratos con Dorado porque a oposición non lle "deixa"

Feijóo, con Rueda durante o Consello © Xoán Crespo

Dos múltiples titulares que xerou a sesión de control ao presidente do pasado mércores ningún puido falar dos contratos asinados pola Xunta con empresas ligadas ao narcotraficante Marcial Dorado. O presidente, Alberto Núñez Feijóo, anunciara que esa quenda de preguntas na Cámara ía ser o escenario elixido para dar conta da información, toda vez que a oposición preguntara ao respecto. Os grupos preguntaron pero o xefe do Goberno non respondeu. No medio da tensión e do cruzamento de improperios a vicevoceira de AGE, Yolanda Díaz, preguntou explicitamente polos contratos e Feijóo. "Señora, como vostede non merece ningunha resposta, remitirei os datos á Cámara, á xustiza e a Galicia", obtivo como resposta. 

Vinte e catro horas despois do tensísimo pleno parlamentario o titular da Xunta respondía este xoves a outras preguntas, as da prensa despois da reunión semanal do Goberno galego, e expuxo ante os informadores as súas razóns para non cumprir o que anunciara. A oposición, argumenta, non lle "deixou". "Onte tiña tres preguntas" e "había unha sobre os contratos da Xunta nos últimos vinte anos co señor Dorado ou empresas do señor Dorado, esa pregunta era exactamente de AGE", evidencia. Entón, por que non a contestou? "Non puiden seguir contestando ás preguntas porque un deputado [Xosé Manuel Beiras] veu ao meu escano e, ademais de dicirme cousas interesantes, fixo puñetazos enriba do escano dun presidente". Polo tanto, "non puiden proseguir coa sesión de control para poder contestar".

Feijóo investiu en esixir desculpas a quenda na que anunciara que ía detallar os contratos

Responde isto exactamente á realidade? Se ben é certo que Xosé Manuel Beiras se achegou ao escano do xefe do Goberno e bateu no taboleiro mentres o increpaba, non o é menos que isto non sucedeu durante a quenda de preguntas de AGE. O líder de Alternativa ergueuse do seu asento cando Feijóo lle respondía ao voceiro do BNG, Francisco Jorquera, a quen considerou que "só lle queda sacar o zapato" ou "emocionarse" para "imitar" máis ao propio Beiras. Cando o grupo que preguntaba era AGE, por boca de Díaz, Feijóo investiu unha quenda en esixirlle "desculpas" e outra, en declararse "farto de tanta ignominia" e recriminarlle que foi "ameazado". Acto seguido, proclamou a devandita negativa a responder.

"Ningún problema" en "acreditar céntimo a céntimo"

Malia todo isto Feijóo asegura non ter "ningún problema" e mesmo sente "urxencia" por "acreditar céntimo a céntimo cales foron os contratos, as axudas, as subvencións" ás empresas de Dorado "durante os vinte anos da Xunta". Así, asevera, vai quedar "claro" que "nin adxudiquei nin asinei ningún contrato con ningunha desas empresas" nin "como secretario xeral, nin como conselleiro, non como vicepresidente nin como presidente". Neste escenario o presidente non aclara, non obstante, se o feito de que el non xestionase os contratos quere dicir que estes non se realizasen. Ao Parlamento, mantén, chegará a información "consellería por consellería" e, xusto despois, "aos medios de comunicación". Cando? "Supoño que de forma inmediata, sobre todo se me deixan traballar con normalidade e non teño que ler teletipos tan agradables como o que vostede me acaba de trasladar", respondeu aos informadores, en referencia a que Yolanda Díaz o cualificara de "macarra" poucos minutos antes.

O presidente mantén que remitirá á Cámara os datos dos contratos "consellería por consellería"

Á marxe dos contratos Feijóo aproveitou a comparecencia deste xoves para volver censurar a actitude de Beiras. "Cada galego ten o seu criterio para votar a un partido ou a outro, pero hai límites que non se poden sobrepasar", di. El, afirma, non vai "engadir máis polémica" pero "pido que non se crispe á sociedade" porque, ao seu xuízo, hai políticos que, "utilizando a súa plataforma de deputado" están a "crispar a sociedade galega aproveitando a dor de moitas familias que o están pasando mal". "Iso -teoriza- é antipolítica e un réxime carente de democracia" e por iso "eu seguirei garantindo o estado de dereito na comunidade autónoma, aínda que a algúns non lles guste".

Feijóo, con Rueda durante o Consello © Xoán Crespo

Despece

  • Yolanda Díaz denuncia a "actitude macarra" de Feijoo e lémbralle que non amosou os documentos

    A coordinadora nacional de Esquerda Unida e vicevoceira parlamentaria de AGE, Yolanda Díaz, apoiou este xoves"absolutamente" e "sen fisuras" a Xosé Manuel Beiras e denunciou a "actitude de César" e "macarra" de Alberto Núñez Feijoo na sesión de control do Parlamento deste mérecores "e noutras ocasións".

    Yolanda Díaz afirmou que Feijoo -"o señor Núñez"- "non merece ser presidente"

    Yolanda Díaz afirmou que Feijoo -"o señor Núñez"- "non merece ser presidente". A líder de EU di que "o presidente da Xunta debe ser unha persoa seria: insultar o voceiro do BNG, poñer o ventilador cando é acusado, ou lexitimar un delicto coma o contrabando non é aceptable". "E terrible a violencia que estamos sufrindo", dixo, ao lembrar as moitas ocasións nas que o presidente da Xunta non respondeu ás preguntas da oposición ou nas que os deputados e deputadas de PSdeG, AGE e BNG non puideron intervir. Tamén recordou os "insultos" persoais ou "alusións machistas" recibidas de deputados do PP.

    A líder de EU di que "o presidente da Xunta debe ser unha persoa seria: insultar o voceiro do BNG, poñer o ventilador cando é acusado, ou lexitimar un delicto coma o contrabando non é aceptable"

    Yolanda Díaz referiuse tamén á amizade de Feijoo e Marcial Dorado con Manuel Cruz, "guerrilleiro de Cristo Rey" e "pistoleiro", e afirmou que quedan moitas incógnitas por contestar por parte do presidente da Xunta. E concluíu que Feijoo "ten que dimitir" pola súa relación co narcotraficante e por non ofrecer as explicacións prometidas: "o presidente da Xunta non contestou ás preguntas porque sabía que a oposición lle estaba metendo o dedo no ollo".

    Rolda de prensa de Yolanda Díaz e Carlos Portomeñe CC-BY-SA Praza Pública

  • Pachi Vázquez ve "infame" que o presidente "ridiculice a emoción" de Beiras

    "Non lembra que Fraga choraba cada vez que abría a boca?". O secretario xeral do PSdeG, Pachi Vázquez, lamentou este xoves a "absoluta falta de sensibilidade" que, ao seu xuízo, demostrou o presidente da Xunta ao tentar "poñer en evidencia e ridiculizar uha persoa que se emociona ou chora cando lembra un familiar ou amigo que faleceu". En plena controversia pola increpación de Xosé Manuel Beiras a Feijóo asegurou non tentar "xustificar a reacción" do voceiro da AGE, se ben considera "infame" ao presidente por ironizar sobre as bágoas do histórico nacionalista.

    "Isto non se lle fai a ninguén" e "define a catadura moral de quen o fai", afirma o líder socialista, para quen Feijóo protagonizou o mércores unha "provocación" á oposición, tanto pola súa actitude con Beiras como por non responder ás preguntas do resto de grupos. Ese debate, di, produciuse "baixo un epígrafe que se chama preguntas ao presidente, non preguntas do presidente". El, di, ten "a obriga moral e legal de contestar e dicir a verdade", pero optou por abrir "un escenario tremendo, de provocación en toda regra".

    Feijóo, pola súa banda, malia atacar a Francisco Jorquera mediante a ironía sobre a emoción de Beiras, asegura ser consciente de que "emocionarse é humano" pero está "en contra das persoas que se emocionan e, a través da súa emoción, trasladan a outro responsable político unha relación cunha actividade noxenta e criminal como as drogas". "Emocionarse e criminalizar simultaneamente non é compatible", di.

     

    Pachi Vázquez, en rolda de prensa CC-BY-NC-SA PSdeG

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza