“Grazas” ao BNG, di o presidente da Xunta, hoxe Abanca ten a súa sede en Galicia e a comunidade “leva aforrados máis de 200 millóns de euros en gasto farmacéutico”
O presidente da Xunta, Alberto Núñez Feijóo, presentou este xoves os acordos aos que el mesmo ten chegado co BNG como un aval de que Mariano Rajoy non renunciará a defender a integridade territorial de España por pactar cos nacionalistas vascos ou cataláns, como vén de facer o PP na Mesa do Congreso dos Deputados. “Grazas” ao BNG, dixo Feijóo, hoxe Abanca ten a súa sede en Galicia e a comunidade “leva aforrados máis de 200 millóns de euros en gasto farmacéutico” sen que o PP renunciase por iso á súa defensa da Constitución e o Estatuto de Autonomía actual.
A Feijóo preguntóuselle na súa comparecencia posterior á reunión semanal do seu goberno pola negativa de Ciudadanos a apoiar a investidura de Mariano Rajoy como presidente do Goberno se pacta con formacións independentistas, como fixo esta semana para configurar a Mesa do Congreso. “Non dubido do compromiso do PP coa Constitución española”, dixo, e engadiu que a súa formación non cambiará a Constitución “por unha investidura”. “Que a Cámara estea presidida polo partido que gañou as eleccións é algo de sentido común”, argumentou, e dixo que iso “calquera partido, nacionalistas incluídos, pode entendelo”.
As gabanzas de Feijóo ao BNG veñen producíndose desde que comezou a súa caída electoral en detrimento primeiro de AGE e logo das Mareas
Foi entón cando Feijóo lembrou dous dos seus propios pactos cos nacionalistas: “En Galicia nós asinamos acordos co BNG, acordos útiles para a comunidade autónoma, non así co PSOE”, e citou o caso do acordo “para non perder as entidades financeiras radicadas en Galicia”, que ao seu xuízo “axudou a que hoxe haxa unha entidade financeira con domicilio social en Galicia”, en referencia a Abanca. Do mesmo xeito, “co BNG asinamos o decreto de medicamentos xenéricos en Galicia”, dixo, e “grazas a aquel acordo co BNG hoxe Galicia leva aforrados máis de 200 millóns de euros gasto farmacéutico”, engadiu. Iso non significa que o PP de Galicia renuncie á Constitución española e o Estatuto de Autonomía”, sentenciou.
As gabanzas de Feijóo ao BNG non son novas. Desde que comezou a caída electoral do BNG fronte a AGE primeiro e as Mareas despois, o líder do PP galego vén eloxiando aos nacionalistas fronte á “nova política”, un feito que voces do BNG entenden como un “abrazo do oso” que tanto serve para menosprezar a súa menguada relevancia electoral como para criticar ás formacións emerxentes ao tempo que divide o voto galeguista de esquerda.
