Feijóo, punta de lanza do PP contra a declaración catalá de soberanía

Feijóo, nun acto coa presidenta do PP catalán © PP Catalunya

Alberto Núñez Feijóo é un dos baróns autonómicos do PP máis reclamados polos seus homólogos doutras comunidades para acudir como paracaidista ás súas campañas electorais. Unha das líderes que con máis frecuencia reclama a presenza do presidente da Xunta é a catalá Alicia Sánchez-Camacho. Con ela e co líder do PP vasco, Antonio Basagoiti, Feijóo protagonizou unha das escenas máis controvertidas da campaña electoral de Catalunya no ano 2010, coa reedición do Pacto do Tinell en clave conservadora e sobre a base da defensa "da unidade de España". Este xoves, vinte e catro horas despois de que o Parlament de Catalunya aprobase a declaración de soberanía impulsada por CiU, ERC e ICV, Feijóo volveuse erixir en punta de lanza do seu partido na materia, neste caso contra a decisión do lexislativo catalán.

Ao remate do Consello da Xunta e a preguntas da prensa Feijóo declarouse "bastante escéptico sobre as casualidades", polo que "non cre casual" que "esta valoración -en referencia ao documento aprobado"- se "faga pública ás poucas horas de concretar que o déficit público de Catalunya excede en máis dun 50% que tiña para controlar o seu gasto público". Obviando que a declaración se viña negociando dende hai semanas, o titular do Goberno galego ve "acreditado" que "isto non é unha casualidade". Pero, en todo caso, para o conservador nada do aprobado o pasado mércores na Cámara catalá ten valor ningún.

"O único suxeito de soberanía que existe é o conxunto do pobo español", proclama Feijóo

"O único suxeito de soberanía que existe é o conxunto do pobo español", proclama Feijóo dende o atril de San Caetano. "Non hai ningún suxeito de soberanía distinto do conxunto do pobo español, é o único suxeito de soberanía en Europa", acrecenta. Por este motivo, na súa opinión a declaración de soberanía non debe ser valorada máis que como un intento do Goberno de Artur Mas para "buscar inimigos exteriores" e así ocultar a súa "incapacidade para xestionar" os asuntos públicos en xeral e as contas da Generalitat en particular.

As reflexións de Feijóo chegaban case ao mesmo tempo que o presidente da Comunitat Valenciana, Alberto Frabra (PP), aproveitaba a ocasión para lanzarlles un convite ás empresas catalás descontentas coa falta de "estabilidade política" derivada, ao seu xuízo, da aposta soberanista do seu Goberno. Segundo o substituto de Francisco Camps estas compañías poden ollar cara á súa comunidade como "unha oportunidade" e así fuxir da "cortina de fume para desviar a atención" que supón a declaración catalá. Ademais, di, a lexislación de Valencia favorece a creación de empresas, "veñan de onde veñan".

Feijóo, nun acto coa presidenta do PP catalán © PP Catalunya

Despece

  • As facturas galegas de 2010

    Poucos minutos despois de censurar a xestión económica da Generalitat de Catalunya Feijóo foi cuestionado pola súa propia, nomeadamente polas facturas que, segundo un informe do Consello de Contas, foron desprazadas do exercicio contable da Xunta de 2010 para o de 2011. Despois de que, segundo informacións publicadas nos últimos días, o organismo fiscalizador ratificase o seu descubrimento, Feijóo obvia o desprazamento de facturas e aférrase a que este non vai afectar aos niveis de déficit público.

    "Que unha administración pública cadre o déficit só lle corresponde decidilo á Intervención Xeral do Estado e ao Ministerio de Facenda", di o presidente que, non obstante, recoñece non ter "a información do Consello de Contas" porque "non nos foi notificada" e, polo tanto, "non sabemos cal foi a resposta ás alegacións [da Xunta]. En todo caso, Feijóo coida que "parece que está claro que nese informe definitivo o Consello non pon en cuestión o déficit da comunidade autónoma".

    Pero, e as facturas? "Sobre as facturas temos a nosa propia opinión, que non ten que ser coincidente coa do Consello de Contas". "Estamos utilizando os mesmos mecanismos de cómputo que se estiveron utilizando durante outros anos", engade, nun contexto no que, dende o entorno do xefe do Goberno galego, se resta valor ao ditame que Contas vaia emitir finalmente.

    Feijóo conversa coa conselleira de Facenda no Consello © Conchi Paz

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza