Pachi Vázquez, O secretario xeral do PSdeG-PSOE, asegurou que "non hai que dramatizar" a posibilidade de que poida haber candidaturas alternativas á que el lidera de face ao XII Congreso Nacional do PSdeG-PSOE, que se celebrará entre o 9 e o 11 de marzo, e afirmou que "se hai listas é unha cousa positiva", aínda que deixou caer que "se non hai listas, pois algún motivo haberá".
Neste senso, a deputada Beatriz Sestayo afirmou este domingo que é posible que "este luns ou martes" se saiba se hai lista alternativa, "posto que se están ultimando os últimos detalles".
En declaracións á SER, o deputado socialista Xaquín Fernández Leiceaga, sinalou que "os que teñen máis responsabilidades no partido teñen que decidir se dan o paso para poder articular unha alternativa ou non", engadindo que "eu claramente estou a favor dunha alternativa, e ese é o meu compromiso, axudar na medida do posible para, digamos, construír un proxecto que ilusione aos cidadáns, que dea resposta ás necesidades de Galicia e que poida ser un proxecto fronte a Feijóo". Porén, sinalou que detecta "insatisfacción sobre a forma na que está a responder o partido ás demandas dos cidadáns en Galicia".