Crise de goberno na Coruña. A alcaldesa, Inés Rey, destituíu a última hora deste martes a secretaria xeral do PSOE coruñés, Eva Martínez Acón, como responsable de Innovación, Industria, Emprego e Consumo, que marchará así do executivo local.
Inés Rey aparta do goberno local a Martínez Acón, secretaria xeral do PSOE coruñés e afín a Gonzalo Caballero
Afín ao secretario xeral do PSdeG, Gonzalo Caballero, a destitución de Martínez Acón é xustificada desde o goberno local pola súa falta de lealdade coa alcaldesa ou a escasa dedicación aos labores no executivo, pero agocha tamén unha crise máis fonda que nunca marchou de todo no socialismo coruñés.
Nunha carta que dirixiu á militancia, Martínez Acón culpa do seu cesamento á reclamación das achegas económicas que o PSOE ten estipuladas para que os cargos electos destinen á agrupación local que, asegura, está nunha "situación económica crítica" e que puxo en problemas mesmo o pago do alugueiro da sede.
A edil decidiu manter a acta e seguirá acudindo aos plenos, pero sen soldo nin dedicación, mentres que a maior parte das súas competencias pasarán ao concelleiro de Educación, Chero Celemín, e outras a Diana Cabanas.
O goberno local xustifica o cesamento na nula dedicación da edil, que atribúe a súa marcha á reclamación das achegas dos cargos electos á agrupación local
A crise no goberno local recibiu as críticas da oposición. Desde a Marea Atlántica cren que a destitución de Martínez Acón é unha mostra máis de que o executivo está "atrapado nunha guerra interna entre as familias do PSOE" e afectado pola "febleza" e a "nula cohesión interna". Ademais, consideran que o cesamento é "un recoñecemento de que a área de Emprego está completamente paralizada, xusto cando o seu labor sería máis necesario".
O BNG, pola súa banda, cre que esta nova crise "aumenta a inestabildiade no Concello, xusto no momento no que menos o necesita a cidade", mentres que o PP acusa o goberno local de estar "descentrado enpelexas internas e axustes de contas".
A destitución de Martínez Acón chega pouco despois de que a concelleira Mónica Martínez, que se presentou ás eleccións locais por Ciudadanos, deixase o partido, pasase ao grupo mixto e se incorporase ao goberno local como responsable de Deportes.
Marea Atlántica e BNG votaron a favor dunha moción do grupo municipalista que reclamaba o cumprimento da última sentenza do Supremo para o cesamento inmediato da edil, que é considerada "tránsfuga" por ambos os dous partidos, que facilitaron cos seus votos a chegada de Inés Rey á alcaldía.
