O candidato socialista á presidencia da Xunta, Xoaquín Fernández Leiceaga, ofreceu este venres en Santiago un "Pacto Galego pola Educación” que, segundo dixo, irá dirixido a "recuperar un ensino público de calidade, devolver o prestixio ao profesorado e incrementar o apoio ás familias". Durante un encontro sectorial sobre educación cn Compostela co ex-ministro de Educación, Ángel Gabilondo, o aspirante do PSdeG propuxo tamén iniciar un Programa de Centros Abertos que "garanta a conciliación da vida laboral e familiar" co obxectivo de que “ningunha familia deixe de ter un fillo por falta de apoio”.
Leiceaga propón un Programa de Centros Abertos que "garanta a conciliación da vida laboral e familiar"
Para levalo a cabo, anunciou que o Goberno galego acordará coa Fegamp a posta a disposición dos concellos as instalacións dos centros públicos para que poidan realizar actividades deportivas, educativas, culturais, artísticas e sociais. Ademais, Fernández Leiceaga propuxo "recuperar o prestixio do profesorado" contratando 2.500 novos docentes e devolvéndolles unhas condicións de traballo “logo de sete anos sufrindo os recortes de Feijóo”.
Ao tempo, prometeu unha batería de propostas que pasan por implantar de forma progresiva ratios máximas de 20 alumnos en infantil, 25 en primaria e 30 en bacharelato, establecer desdobramentos e dotación de profesorado de apoio que permitan a atención á diversidade. Leiceaga criticou a “desastrosa xestión” da política educativa por parte de Feijóo, "centrada no recorte do profesorado, a ruptura do consenso lingüístico, a eliminación da gratuidade dos libros de texto e a imposición de subvencións a centros concertados que segregan por sexo".
O PSdeG proponse "refacer a desfeita de Feijóo" e aposta por "eliminar as subvencións dos centros que segregan por sexo"
Así, advertiu que “agora" son os socialistas os que teñen que "refacer a desfeita de Feijóo, recuperando as condicións do profesorado, recuperando os libros de texto gratuítos, eliminando as subvencións dos centros que segregan por sexo e garantindo un modelo educativo plurilingüe”. Sinalou tamén que os alumnos e alumnas deben saír do ensino obrigatorio con competencias plenas en galego e castelán e capacitados en linguas estranxeiras.
Fernández Leiceaga comprometeuse a “asegurar unha educación pública e laica, cmo dereito universal, igual e integrador, dentro dun proxecto común de cidadanía”. Tamén anunciou unha serie de medidas dirixidas a garantir a implantación laboral dos estudantes impulsando a FP Dual incorporando novos grupos empresariais aos módulos xa existentes e creando unha Escola de Masters para poñer en marcha estudos con demanda social en cada área en colaboración coas universidades galegas.
