O BNG celebrou este sábado o seu último Consello Nacional deste ano, no que iniciou a preparación das eleccións municipais de 2027 aprobando o regulamento para a elaboración das candidatura nas sete cidades.
Así o explicou a portavoz nacional do BNG, Ana Pontón, que explicou que a fronte nacionalista aprobou un calendario de traballo no que se marca o primeiro semestre de 2026 para elixir os candidatos e as candidatas ás alcaldías das sete urbes, un proceso que, "en todo caso, está aberto ao conxunto dos concellos".
Pontón advertiu de que o "obxectivo clave" do Bloque é "aumentar" a súa representación municipal para "fortalecer o nacionalismo" e "consolidar o proxecto de goberno alternativo que representa o BNG". "Traballamos cun obxectivo moi claro: ampliar a nosa base social e electoral ao longo e ancho do país como paso previo ao reto de liderar o goberno de Galicia".
O BNG marca o primeiro semestre de 2026 como data para elixir os candidatos e as candidatas ás alcaldías das sete urbes
Segundo Pontón, a clave para conseguir o obxectivo é "traballar con ideas claras, dirixirse á sociedade cun sorriso nos beizos e coa man tendida para demostrar cada día que hai outra forma de facer política afastada da crispación, o insulto e da lameira que nos intoxica desde a política estatal".
Así, lembrou que mentres no BNG defenden "a democracia e a honestidade", no PP "fomentan o transfuguismo con mocións de censura escuras e, mesmo, con coaccións", en alusión á manobra levada a cabo en Ribeira ou ao "intento" en Compostela.
Pontón advirte que a condena de García Ortiz "non é o primeiro caso de 'lawfare' no Estado español"
Ademais, e respecto á condena ao final xeral do Estado, Álvaro García Ortiz, por un delito de revelación de segredos, Pontón lembrou que "non é o primeiro caso de lawfare no Estado español". "Hai que lembrar que antes foron por nacionalistas, por movementos sociais, por medios de comunicación...", dixo. "Nese momento o PSOE miraba para outro lado porque non lle afectaba directamente", engadiu.
"Se fan iso a un fiscal xeral, que non farán a calquera persoa común", continuou Pontón, que asegurou que se fan 50 anos da morte do ditador, pero que non se pode "dar por morto o franquismo". "Ao contrario, rebrota un discurso involucionista", rematou.
