Despece

• Esquerda Unida critica a reforma electoral do PP, pero tamén a BNG e PSdeG

  A Executiva Nacional de Esquerda Unida emitiu este mércores un duro comunicado no que critican a PP, PSdeG e BNG. EU considera que o BNG e José Blanco "búrlanse das galegas e galegos propoñendo a reforma da lei electoral despois de rexeitar a proposta presentada por Esquerda Unida durante o goberno bipartito”.

  "EU mantivo tres xuntanzas oficiais durante o bipartito de cara a unha posible reforma electoral", recorda Yolanda Díaz, coordinadora xeral da coalición, que lembra que se reclamaba que se eliminase o límite do 5% para poder acceder ao Parlamento así como "a instauración dunha circunscrición única para Galicia".

  Ademais, a candidata á Xunta de Galicia por EU considera que ao PP "non lle sobran políticos, o que lle sobran son institucións" en referencia á intención da Xunta de reducir o número de parlamentarios. "Exiten outras maneiras de recaudar cartos sen reducir en democracia e pluralismo sen reducir a representación do pobo, falamos de reducir persoal de confianza non elexido pola cidadanía e non eliminar os representantes electos", asegura.

  Esquerda Unida considera que esta reforma electoral "supón un atentado á democracia e ao pluralismo". "O PP por activa, sendo a segunda vez que antes das eleccións autonómicas reforma a lei no seu interese, como foi en 1993 cando o goberno Fraga subiu a barreira legal do 3% ao 5%", lembra, pero engade que PSdeG e BNG tamén atentan contra a democracia "por pasiva", tras "negarse a facer unha reforma en positivo voltando a barreira legal ao 3% e mesmo sen vontade de instaurar a circunscrición única aproveitando o proceso de reforma estatutaria aberto polo bipartito”. Para Díaz, este é "un feito máis que demostra o tripartidismo harmónico existente no Parlamento galego desde hai anos".

• Feijóo, disposto a propoñer unha segunda volta electoral

  O presidente da Xunta, Alberto Núñez Feijóo, admitiu que a proposta de reforma da Lei electoral do BNG é "lexítima", pero avisou de que a circunscrición única podería "prexudicar" a representatividade de Galicia se se copia" en España, para engadir que o PPdeG tamén levou "a súa propia proposta" no seu programa electoral, que pasa porque goberne a lista máis votada ou, se non, por unha segunda volta.

  "Se é o caso presentarémola para que sexa debatida na Cámara", manifestou Feijóo na rolda de prensa posterior ao Consello da Xunta, na que se reafirmou en que a alternativa defendida polo BNG en resposta á intención do PPdeG de recortar de 75 a 61 os deputados do Pazo do Hórreo esixiría unha modificación do Estatuto e un referendo.

  Ademais, aclarou que hai que "ter coidado" coas ideas que se pon sobre a mesa e subliñou que Galicia sería das autonomías "máis prexudicadas" nas Cortes cunha circunscrición única por comunidade. Iso si, remarcou que é unha proposta "lexítima", para engadir que, en calquera caso, nesta lexislatura "non hai tempo" para acometer unha reforma que esixa cambios no Estatuto.

  "A do BNG é unha proposta razoable, seguro que hai posibilidades de discutila na próxima lexislatura. Pero hai moitas opcións, o PP levaba no seu programa a proposta de que goberne a lista máis votada ou, se non, que haxa unha segunda volta. Se é o caso presentarémola para que sexa debatida na Cámara", aseverou.

  No entanto, lembrou que os populares levan "moito tempo" expoñendo esta cuestión, antes e defender que en democracia "é fundamental" que goberne "o que gañe". "Na maioría dos países de Europa é así", advertiu o xefe do Executivo galego.