Despece

• "O PP empeza a raiar a maioría suficiente para gobernar"

   PP organizou o único dos cinco actos que se celebrou nun recinto pechado. Alberto Núñez Feijóo chamou ao "voto da estabilidade, da unidade e do crecemento" e afirmou que Galicia será a primeira en iniciar "a recuperación económica". 

  O candidato do PP amosouse optimista e afirmou que o PP "empeza a raiar a maioría suficiente para gobernar"

  No acto o PPdeG presentou tamén a súa canción de campaña, da que ao igual que hai catro anos se encargou o grupo ferrolán Los Limones. Desta vez o tema titúlase Veña, Galicia. Tamén se puideron ver, respondendo ás suspicacias dos últimos dias, bandeiras e faixas co logotipo do Partido Popular.

  Feijóo amosouse convencido de que se poderá crear emprego:"Seremos capaces de conseguilo porque somos Galicia. Demostrámolo ao longo da Historia". O candidato do PP amosouse optimista e afirmou que o PP "empeza a raiar a maioría suficiente para gobernar". O actual presidente da Xunta concluiu que "non me presento contra ninguén, senón contra a crise económica e por iso pídovos o voto a favor do crecemento de Galicia".

  

• Pachi Vázquez presenta “unha proposta distinta” que en lugar de cobrar medicamentos “lles cobre impostos á banca”

  En Vigo, nun acto no que estiveron presentes o cabeza de lista por Pontevedra, Abel Losada, e o alcalde, Abel Caballero, Pachi Vázquez pediu o voto para presidir “un goberno de progreso en Galicia que lle cambie a vida á xente” e que sexa a “barreira” á política neoliberal do PP. Vázquez afirmou que é a única alternativa ao “camiño da dereita que ofrece máis paro e máis recesión e menos sanidade e educación” e “sitúanos no vieiro de Portugal e Grecia”.

  O candidato socialista advertiu que o voto ao PP supón “apoiar que aos enfermos de diálise lles cobren polas ambulancias ou non lles fagan as mamografías as mulleres”. E en contraposición anunciou “unha proposta distinta” que en lugar de cobrar medicamentos e rebaixar as pensións “lles cobre impostos á banca”. A este respecto anunciou que “en lugar de incrementar o IBI nun 40 por cento como queren facer Rajoy e Feijóo dende xaneiro imos poñer impostos aos grandes patrimonios, en vez de subir o recibo da auga nun 140 por cento –como van facer- vamos subirlle a fiscalidade aos que cobran mais de 140.000 euros ao ano”.

  Pachi Vázquez comprometeuse a “dicir a verdade, dicir poucas cousas pero que vaiamos a facelas” porque, sinalou “só hai algo peor que estar mal, e é que te enganen”

  O candidato socialista comprometeuse tamén a “suprimir o decreto que sepultou o galego neste país” porque, dixo, “queremos falar a lingua propia do noso país”. Sinalou que “eu falo, sinto, soño e quero pensar sempre en galego” e advertiu que “se son presidente terei na miña cabeza en Galicia e estarei para pensar nos problemas de Galicia, non para coller o primeiro avión a ver si me resolven os problemas noutro sitio”.

  Pachi Vázquez comprometeuse a “dicir a verdade, dicir poucas cousas pero que vaiamos a facelas” porque, sinalou “só hai algo peor que estar mal, e é que te enganen”. Nesta liña, comprometeuse a aprobar 25.000 bolsas – contrato para outros tantos mozos e mozas galegos desempregados que, explicou, “custan 60 millóns de euros, mentres o orzamento da Xunta é de 9.000 millóns de euros”.

  

• "O PP usa o pretexto da crise para concentrar o poder en poucas mans"

  No acto de apertura de campaña do BNG, que se celebrou na Praza de Praterías, Francisco Jorquera chamou a concentrar o voto de esquerdas e nacionalista no Bloque: "o PP ten as eleccións perdidas se os votos nacionalistas e de esquerdas concéntranse no BNG".

  "O PP ten as eleccións perdidas se os votos nacionalistas e de esquerdas concéntranse no BNG"

  Guillerme Vázquez, Ana Pontón, Camilo Nogueira ou Rubén Cela acompañaron a Jorquera no mitin. O candidato nacionalista chamou a "poñer fin ao peor Goberno da historia de Galicia" e denunciou que o PP "usa o pretexto da crise para concentrar o poder en poucas mans". E puxo como exemplo dos beneficiados polo PP a os directivos das caixas fronte a milleiros de cidadáns estafados coas preferentes. De igual xeito denunciou que as políticas do PP de "recortes" levan a que paguen "pensionistas, mozos, autónomos ou mulleres. Todos menos os que lle prestan o seu avión privado para pasear", denunciou.

  Finalmente, o BNG puxo o énfase na necesidade de que Galicia estea presente no debate territorial que se volve abrir en España.

  

• "Alternativa Galega de Esquerda será a chave da derrota de Feijoo. Somos o voto máis útil”

  Xosé Manuel Beiras e Yolanda Díaz protagonizaron o arranque de campaña da Alternativa Galega de Esquerda en Compostela, xunto á igrexa de Salomé, cunha pegada de carteis que saiu do habitual ao realizarse grafitis que despois asinaron os candidatos. Durante o acto fixeron un chamamento á “rebelión cívica” para “desaloxar os bárbaros do PP do goberno e loitar por un futuro para Galicia”.

  AGE considera "preciso" fomentar "a reactivación dos movementos cívicos animando á cidadanía desencatada a participar nas vindeiras eleccións"

  Beiras afirmou que "no PP actúan como ventrílocuos dos grandes poderes da banca onde están instalados os auténticos ladróns” mentres que Díaz chamou a “dar unha virada de 180º e priorizar os servizos básicos entre os que se atopa a sanidade pública ou o ensino”. Un e outro consideraron "preciso" fomentar "a reactivación dos movementos cívicos animando á cidadanía desencatada a participar nas vindeiras eleccións".

  Os candidatos insistiron en que AGE será “a chave da derrota de Feijoo. Somos o voto máis útil” e concluiron: “É a hora dos cidadáns, así que exerzamos o protagonismo e o poder que noso como pobo e poñamos fin ás políticas de exterminio e destrucción impulsadas polo Partido Popular”.

  

• Bascuas: "Compromiso é 'o novo' fronte as vellas formas de facer política”

  Compromiso por Galicia realizou a súa apertura de campaña cun acto na praza oito de marzo de Compostela. Xoán Bascuas, candidato á presidencia da Xunta, salientou que CxG “non se pon límites” nestas eleccións e afirmou que “imos entrar no Parlamento para ser a voz da cidadanía galega”. Segundo Bascuas, a cidadanía está desencantada cos partidos tradicionais, xa que “representan máis do mesmo e non aportan absolutamente nada novidoso” e sinalou que Compromiso é “o novo” fronte o resto de partidos, que “son os vellos vicios e as vellas formas de facer política”.

  Bascuas denunciou que o PP “ten moita razón no seu lema electoral”, xa que nos últimos tres anos “Galicia é a primeira que máis emprego destrúe, a primeira en políticas antisociais e a primeira en xerar desigualdades”. CxG basea a súa proposta en poñer “a economía ao servizo das persoas e recuperar a idea de xerar emprego, confiando na iniciativa e no bo facer dos homes e mulleres do noso País", segundo Bascuas.

  Pola súa banda, o candidato por Pontevedra, Rafael Cuíña, afirmou que Compromiso será “a voz de empresarios e autónomos, agricultores, xentes do mar, obreiros, mozos e mozas”.