O PP galego, morno ante a fin do dereito ao aborto

Feijóo, tras o Consello da Xunta deste venres © Xunta

O PP galego alimenta as teses antiabortistas dende o seu retorno á Xunta a mediados de 2009. Unha lei á medida do Foro Español de la Familia, subvencións aos grupos autodenominados 'provida' ou protocolos para "promocionar" que as mulleres sigan adiante cos embarazos non desexados son só algunhas mostras das medidas desenvolvidas polos conservadores dende o Goberno galego mentres a lexislación estatal camiñaba xusto na dirección contraria coa aprobación da lei de prazos de 2010. Con estes antecedentes o PP galego e especialmente o presidente da Xunta, Alberto Núñez Feijóo, acollen a contrarreforma impulsada polo gabinete de Mariano Rajoy cun ton morno que semella tentar conciliar a súa propia política coa imaxe centrista que tentan proxectar no resto do Estado.

Tras días de mutismo practicamente total o primeiro dirixente do PPdeG en pronunciarse ao respecto foi o líder das Novas Xeracións, Javier Dorado. A través de Twitter o tamén deputado asegurou que para el este é "un tema de absoluta incomodidade" no que considera, entre outras cuestións, que "a muller que leva no seu ventre un feto é a mellor preparada para protexer o non nacido, moito mellor que o Estado", discrepando ademais de que a malformación do feto fique fóra dos supostos contemplados pola lei. Non obstante, Dorado asegura confiar no Goberno e, dende a defensa da "sensatez" do ministro Ruiz-Gallardón, insiste en que a lei de 2010 rachou o "consenso" -foi rexeitada só polo PP e parte de CiU-.

Feijóo tenta levar a cuestión ao terreo do tirapuxa ordinario entre partidos

Con este pano de fondo este venres a Xunta celebrou a reunión semanal do Consello. Na xornada en que Ruiz-Gallardón promociona o seu proxecto en La Razón e ABC o xefe do Goberno galego optou por un ton aínda maís morno que o do seu líder xuvenil, tentando ademais, como adoito, ubicar a cuestión no terreo do tirapuxa ordinario entre partidos. Así, o presidente defende a "lexitimidade" do Goberno de Rajoy para "regular a interrupción voluntaria do embarazo en España" despois de que o anterior, o regulase "unilateralmente" cunha reforma que, teima, "rachou" o consenso.

O presidente insta a agardar ao trámite parlamentario, no que Ruiz-Gallardón xa advirte de que "a lei non se modificará"

Dende a evidencia de que este "é un asunto de enorme complexidade política, xurídica e moral" Feijóo evita ofrecer a súa opinión sobre se o aborto debe ou non ser un dereito das mulleres. Iso, di, farao "nas canles do partido". Ante a opinión pública limítase a sinalar que "ben paga a pena mellorar" o proxecto abordado a pasada semana no Consello de Ministros e "concretar exactamente" no "suposto de malformación do feto". "Ben paga paga a pena apuntar posibles acordos", di Feijóo que tamén esquiva a pregunta de se, ao seu xuízo, o plan de Ruiz-Gallardón considera ás mulleres unha caste de menores de idade. "Non creo que se considerase menor de idade á muller española durante 20 anos, coa primeira lei do aborto socialista", retruca, obviando, entre outros aspectos, que a lei de supostos de 1985 era menos restritiva que a que agora se formula.

"Estamos falando dun anteproxecto, polo tanto, estamos falando dun texto ao que lle queda un longo percorrido polas Cámaras", di Feijóo. Horas antes, o ministro de Xustiza xa respondera a estas aspiracións nas páxinas de La Razón: "a lei non se modificará no Congreso", advirte.

Feijóo, tras o Consello da Xunta deste venres © Xunta

Despece

  • Rajoy fai o imposible para non responder sobre o aborto

    Por Natalia Chientaroli

    Era, ademais da subida da luz, o tema da semana. A reforma da lei do aborto non ocupou unha soa liña do discurso do presidente do Goberno, Mariano Rajoy, na rolda de prensa tras o Consello de Ministros na que fixo balance de 2013 e dos dous anos que leva de lexislatura. É máis, nas súas respostas nin sequera chegou a pronunciar a palabra aborto. Utilizou "ese asunto" ou "ese tema" para referirse á lei máis polémica dos últimos meses que afecta directamente aos dereitos individuais e que recibiu críticas da prensa internacional e mesmo dentro do propio PP.

    Ante as preguntas dos xornalistas foi breve, expeditivo e mesmo elíptico. Non fixo unha análise do proxecto, non falou del como unha promesa electoral, tal como fixeron outros dirixentes do partido, nin mostrou o seu apoio explícito ao ministro de Xustiza, Alberto Ruiz-Gallardón. Tampouco se referiu ás críticas que se fixeron á lei desde os países europeos nin comentou o apoio explícito da ultradereita francesa de Jean Marie LePen. A todas estas cuestións respondeu cunha concisa frase na que describía a reforma como "equilibrada" e "na liña da lei de 1985", unha norma "que nós non modificamos cando chegamos ao Goberno en 1996", dixo Rajoy. Ademais destacou que esa norma, que estivo vixente até 2010, foi cambiada "sen anunciarse en ningún programa electoral".

    Unha das preguntas ao presidente sobre o tema referiuse ás afirmacións o ministro de Xustiza, Alberto Ruiz-Gallardón, sobre que non se cambiará un chisco do anteproxecto no seu trámite parlamentario. Por que non se aprobou directamente por decreto?, inquiriu a xornalista Marisa Cruz, do xornal El Mundo. "Hai cousas que non se poden aprobar cun decreto. Debería vostede sabelo", espetoulle Rajoy. E ante a insistencia doutro compañeiro resolveu: "É unha cuestión do Congreso".

    As críticas internas do partido ao proxecto de lei mereceu para Rajoy apenas unha frase: "É un tema que ás veces produce que haxa posicións diferentes no meu partido e noutras formacións políticas".

    Nos últimos días e ante as voces diverxentes que comezan a ouvirse dentro do PP especúlase coa posibilidade de que no trámite da lei volva incluírse o suposto de malformación grave do feto entre as razóns que poden alegarse para interromper voluntariamente un embarazo. Rajoy cortou en seco esa reflexión: "Non vou adiantarme aos acontecementos porque isto xa corresponde ao Parlamento".

    Pregunta tras pregunta o presidente evitou entrar ás cuestións que expón a reforma da lei do aborto. Mesmo até o punto de non contestar sobre se se daría liberdade de voto aos lexisladores do PP sobre este tema esgrimindo un seco: "Xa falei suficientemente".

    Rajoy, nun intre da rolda de prensa © Goberno de España

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza