Os populares denunciaron unha rolda de prensa do secretario xeral dos socialistas, Gonzalo Caballero, do pasado 4 de xullo, máis dun mes despois das eleccións, na que aínda se vía ás súas costas a petición de voto
A Xunta Electoral vén de arquivar unha denuncia do PP que reclamara a ese organismo sancionar ao PSdeG porque o día 4 de xullo nunha rolda de prensa na súa sede do seu secretario xeral, Gonzalo Caballero, se podía ler ás súas costas un cartel co texto “Vota PSdeG-PSOE”. A Xunta Electoral rexeita a denuncia argumentando que, unha vez superadas as eleccións municipais do pasado 26 de maio, nese momento non había ningún proceso electoral en marcha no que ese cartel puidese interferir.
O PP criticaba na súa denuncia que xa pasara máis dun mes das eleccións municipais, tempo que consideraba suficiente para que os socialistas retirasen ese cartel do interior da súa sede. Porén, a Xunta Electoral rexeita a súa petición indicando que ese cartel non podía ter xa incidencia nos electores porque xa non había eleccións polo medio. A denuncia foi inicialmente desbotada pola Xunta Electoral de Zona de Santiago, pero os populares recorreron e este martes a Xunta Electoral Provincial vén de ratificar que non hai nada sancionable.
"A denuncia e o recurso presentados son manifestamente extemporáneos, polo que tampouco procedería acordar a retirada do lema”, di a Xunta Electoral
O acto do PSdeG, di a Xunta Electoral Provincial, “non pode ter incidencia algunha no libre exercicio do dereito de voto polos electores, xa que foi realizado fóra do período electoral e con posterioridade á celebración das últimas eleccións, de xeito que a denuncia e o recurso presentados son manifestamente extemporáneos, polo que tampouco procedería acordar a retirada do lema obxecto de denuncia, como expresamente se interesa”.