Os secretarios provinciais do PSdeG inician mandato coa vista posta nas autonómicas

Caamaño, Besteiro, Fernández e Héctor CC-BY-SA Praza Pública

Un dos primeiros deberes que Pachi Vázquez tivo que afrontar como secretario xeral do PSdeG foi adaptar a estrutura do partido á do resto do Estado. Galicia era a única autonomía na que un partido federado ao PSOE non se organizaba de maneira provincial. Así, despois da abrupta perda do Goberno galego en 2009 iniciou o proceso para dotarse de estruturas e de, polo tanto, liderados nas catro provincias. Tras os correspondentes congresos as secretarias provinciais quedaron en mans de Salvador Fernández Moreda, na Coruña, Ricardo Varela, en Lugo, Raúl Fernández, en Ourense, e Modesto Pose, en Pontevedra. Despois do congreso extraordinario do PSOE en Sevilla e tras o duodécimo congreso nacional do PSdeG foi a quenda para renovar por segunda vez as provincias no socialismo galego. Ás portas da precampaña e da campaña das eleccións autonómicas e coa candidatura socialista para as mesmas aínda por decidir só un dos secretarios provinciais repite, o ourensán Raúl Fernández, mentres que as tres restantes direccións foron renovadas con Francisco Caamaño, José Ramón Gómez Besteiro e Santos Héctor á fronte.

Caamaño: "O meu papel vai ser buscar a mellor solución para que os socialistas galegos acadar os mellores resultados e, a poder ser, o Goberno"

Tras estas citas congresuais dun xeito esquemático é posible afirmar que dúas das direccións provinciais, Ourense e A Coruña, por esta orde, quedaron na órbita do secretario xeral, Pachi Vázquez. Outro congreso, o de Lugo -o único cun único candidato-, configurou unha directiva un chisco máis afastada e sensiblemente máis lonxe está a de Pontevedra, baixo o influxo do alcalde vigués, Abel Caballero. Esta correlación de forzas pode ser determinante ou, cando menos, ter un importante peso para o proceso de primarias que a dirección nacional do partido prevé culminar en setembro e nas que aínda é unha incógnita se haberá máis candidaturas que a do propio Vázquez. Neste sentido as olladas siguen pousándose sobre dous dos novos secretarios provinciais: o coruñés Caamaño e o lugués Besteiro.

En conversa con Praza Pública o ex ministro e o presidente da Deputación de Lugo optan pola prudencia, se ben ao seren cuestionados pola posibilidade de encabezaren unha candidatura alternativa non pechan a porta ou, cando menos, non o fan completamente. "O proceso de primarias abrirase no momento oportuno", constata Caamaño, e o seu "papel" no proceso vai ser "buscar a mellor solución para que os socialistas galegos poidamos acadar os mellores resultados e, a poder ser, obter o Goberno da Xunta". "Ese é o meu obxectivo, traballar para que o socialismo galego estea na mellor posición", abonda, nun contexto no que, lembra, no propio congreso provincial se comprometeu a "non tomar nunca en solitario" ningunha decisión sobre as primarias, sexa "apoiar" unha candidatura ou encabezala. El, di, decidirá "escoitando a militancia da provincia" e nunca en clave de "aventuras persoais". Así e todo, no entorno de Pachi Vázquez obsérvase a Caamaño próximo ao secretario xeral e considérase pouco probable que decida optar a ser cartel electoral.

Besteiro cre que "mal secretario provincial sería" se, tras ser elixido, "estivese pensando" nas primarias

Mentres, dende Lugo, Besteiro reflexiona, en declaracións a este diario, que "cando cheguen as primarias este partido saberá facer o que ten que facer", sen "medo a votar" pero, no seu caso particular, "mal secretario provincial sería se estivese pensando noutras cousas", isto é, en dar o salto á política galega. "Fun elixido e estou moi ilusionado co encargo que me fixo o meu partido", di Besteiro, que relega o "debate" das candidaturas ata o momento mesmo da "chegada" dunhas primarias que, en calquera caso, non son en absoluto un "proceso de debilitamento", senón "para fortalecerse". "Outros partidos prefiren a dedocracia", di o lugués, a quen voces internas sitúan nas proximidades do ex ministro de Fomento, José Blanco, pero tamén con boa relación co alcalde da capital da provincia, Xosé López Orozco, quen pola súa banda ten escenificado o seu divorcio político de quen fora número dous de José Luis Rodríguez Zapatero.

Onde non caben dúbidas a respecto do apoio a que Vázquez opte á presidencia da Xunta é na dirección de Ourense, onde o seu líder, Raúl Fernández, coida que o partido ten a "suficiente madurez" como para aparcar as "diferenzas" que puidesen quedar tras o congreso provincial -o deputado Pablo López Vidal encabezou unha candidatura alternativa-, "esforzo" encamiñado a "afrontar as autonómicas con toda a unidade". En calquera caso, explica Fernández, a estrutura da organización ten a "suficiente madurez" dado que "xa no propio período precongresual este congreso se distinguiu pola tranquilidade" e a ausencia de "saídas de ton". O debate, di, mantívose "no ámbito interno, que era o que a militancia quería".

Primeira Executiva nacional do PSdeG tras os congresos CC-BY-NC-SA PSdeG

Despece

  • "O da Coruña foi o socialismo galeguista por excelencia no PSdeG, cómpre recuperalo"

    O da Coruña foi, co de Pontevedra, o congreso provincial do PSdeG máis rifado. Con tres candidaturas e un intento frustrado de unidade, a Francisco Caamaño correspóndelle iniciar unha andaina na que, asegura, o "sentido democrático" permite que, "unha vez elixido o secretario xeral, esteamos xuntos" para "reforzar a cohesión e a unidade" e "recuperar algo moi importante", que volva xogar o papel do "socialismo galeguista por excelencia dentro da tradición do PSdeG", o que implica ter "máis forza política". "Cando o socialismo coruñés se move, móvese o socialismo galego", afirma.

    Así e todo, Caamaño tampouco perde de vista que a provincia da Coruña foi a que saíu peor parada en termos cualitativos das últimas eleccións municipais, se ben matiza que é tamén neste territorio "onde máis veces se derrota á dereita en Galicia". En clave local o seu reto é "recuperar o goberno das tres grandes cidades" e, en clave galega, afirma que traballará para confirmar que a Alberto Núñez Feijóo se lle "acabou o discurso" segundo a cal "el nunca ten nada que ver" cos problemas do país. "non lembro un plan da Xunta para atender o desemprego", exemplifica. "Todo isto nótase e por iso os cidadáns van elixir", conclúe.

    Francisco Caamaño CC-BY-NC-SA PSdeG

  • "O PSdeG ten que aglutinar a alternativa ao PP"

    Dende o seu duplo papel de líder do PSdeG en Lugo e de presidente da Deputación José Ramón Gómez Besteiro márcase o reto de que o PSdeG poida "recuperar a confianza dos cidadáns", tamén dos que lles "deron as costas", ata o punto de "volver ser referencia" e poder "aglutinar a alternativa ao PP". "Para iso -explica- hai que estar preto" da cidadanía, "recoñecer os problemas que ten a xente e que se nos interprete como un partido que é quen de resolver problemas". No seu caso, sinala, este labor comeza por Lugo e os seus "problemas específicos", como a demografía, a xestión do territorio ou da riqueza forestal, así como afrontar "os recortes en educación" ou, nun campo máis amplo, os efectos do rescate financeiro.

    Os socialistas, di, realizarán este labor con "vocación de Goberno" e para iso coida que o propio partido é "unha máquina moi poderosa" despois de renovar as súas estruturas. "Atopámonos cunha Xunta incapaz de resolver problemas e de cumprir os compromisos", como "acabar co paro, ter un sistema financeiro" ou dinamizar a economía pola vía da industria eólica. "Os cidadáns non perciben a situación idílica que retrata o presidente da Xunta", coida Besteiro, tras tres anos que "empezaron coa lingua, considerándoa un problema cando é unha riqueza", e "continuaron enfadando a función pública" e rematan "cabreando os agricultores, o sector naval e a todo que poida supoñer un valor para este país. "A sociedade galega está moi decepcionada con quen se presentou como un marabilloso xestor", asegura.

    O socialista Gómez Besteiro preside a Deputación de Lugo CC-BY-NC-SA PSdeG

  • "Hai un cambio de tendencia e confiamos en dar resposta ás demandas cidadás"

    Raul Fernández inicia o seu segundo mandato como secretario provincial do PSdeG en Ourense con dúas intencións esenciais: lograr que o partido teña "presenza relevante" en todos os concellos da provincia e contribuír ao cambio político en Galicia. Para iso, di, toda a organización que dirixe ten "vontade de ter unidade e de traballar conxuntamente". "Eu creo que hai que facer unha análise con perspectiva histórica" para conclúir, di Fernández, que tanto cando o bipartito accedeu ao poder como cando o perdeu estas mudanzas aconteceron por unha "faixa moi estreita de votos". Na actualidade, di, o "pensamento cidadán" reflicte que Feijóo "non atinxiu para nada os obxectivos que se marcara, foi decepcionante" e, polo tanto, "hai partido" de cara á cita coas urnas.

    A esa "decepción" en Galicia únese o labor do Goberno central, que "no período curto que leva, entrou como elefante en cacharrería", poñendo en marcha "medidas absolutamente contrarias ao que prometeran en campaña, de aí o rexeitamento social" e "as primeiras consecuencias", como "non gañar en Andalucía", malia que o PP "tiña moi ben" as súas expectativas electorais e non lograr incrementar a súa cota de poder en Asturias. "Hai un cambio de tendencia", di Fernández, nun contexto no que o reto do PSdeG, di, é lograr a "confianza" da xente para que o electorado non se limite a "castigar a alguén polo que fixo ou non fixo".

    Raúl Fernández, secretario provincial de Ourense CC-BY-NC-SA PSdeG

  • "As decisións da provincia non se toman en Santiago"

    O concelleiro vigués Santos Héctor accedeu á secretaría xeral do PSdeG pontevedrés marcado polo influxo do alcalde da cidade, Abel Caballero, unha "sintonía" co rexedor que, segundo ten manifestado tras o cónclave, se utilizou para "desacreditalo" pero que na súa opinión é un "valor positivo". Como xa fixera durante a propia cita congresual Héctor defende que o seu mandato estará marcado pola "autonomía orgánica" da dirección provincial a respecto das cúpulas nacional e federal do partido. "As decisións de Pontevedra non se toman en Santiago", resume, na liña do xa manifestado en pasadas semanas por Caballero que, en medio da controversia polo cobramento do IBI á Igrexa católica, advertiu que non recibe "instrucións de ninguén".

    Á marxe disto Héctor coincide cos seus tres homólogos en que o principal obxectivo da formación socialista para os vindeiros meses debe ser propiciar o cambio de Goberno na Xunta. Para isto, di, a provincia de Pontevedra fuxirá "dos personalismos" e "contará con todos", tamén co sector crítico. Nesta liña, o novo líder provincial lembra que o seu opoñente no congreso, Juan Manuel Rey, se amosou disposto a "poñerse a traballar xa coa nova dirección". Neste sentido, o vigués non ve problemas nas tensións vividas durante o congreso, unha "disputa democrática" nun "partido democrático".

    Santos Héctor, líder do PSdeG en Pontevedra © Concello de Vigo

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza