A unión municipal impulsada por Feijóo no remate do seu primeiro mandato xa establecera a capitalidade en Oza e agora ese será o “único núcleo urbano do concello en detrimento do núcleo de Cesuras”
O 13 de marzo de 2012, hai agora dez anos, o presidente Feijóo anunciaba no último debate de política xeral do seu primeiro mandato á fronte da Xunta o seu desexo de impulsar a fusión de dous concellos coruñeses que non citou e que resultaron ser Oza dos Ríos e Cesuras. Un ano máis tarde o decreto do Goberno galego que aprobou a fusión dos dous municipios estableceu que o novo concello chamaríase Oza-Cesuras e que “a capitalidade do novo municipio radicará no núcleo de Oza”. Tamén quen viña sendo alcalde de Oza dos Ríos, José Pablo González Cacheiro, foi quen o seguiu sendo do concello fusionado.
Unha década despois daquela unión, seguida uns anos máis tarde pola de Cerdedo e Cotobade, Oza-Cesuras está a tramitar aínda agora o seu primeiro plan de urbanismo conxunto. E nel ratifícase a primacía de Oza tamén cara ao futuro, establecéndose que ese “como único núcleo urbano do concello en detrimento do núcleo de Cesuras”.

O Plan Xeral de Ordenación Municipal (PXOM) de Oza-Cesuras vén de ser sometido a exposición pública para a súa avaliación ambiental. Nel reflíctese como Oza xa contaba cun PXOM aprobado en 2001 mentres Cesuras dispuña só de normas subsidiarias de carácter inferior e aprobadas en 1997. Pero é agora, unha década despois da fusión, cando o novo plan agora en tramitación di que “se converte nunha necesidade a unificación da normativa en todo o concello”. “A día de hoxe, o mencionado planeamento e as normas subsidiarias están a demostrar certa ineficacia”, engade o documento, que di que iso “motiva a súa necesaria revisión”.
O novo e primeiro plan conxunto di que “o modelo de desenvolvemento elixido responde á nova situación que está a vivir o concello trala súa fusión, cunha evidente concentración da poboación na zona norte, pola súa proximidade a Betanzos, polo que se potencia a centralidade de Oza”. E fixa unha serie de obxectivos a acadar entre os que, tras o primeiro de unificar a normativa, figura como segundo o “fomento da forza da fusión do concello, potenciando o crecemento do concello cara o norte, dada a súa proximidade ao nodo Betanzos-Coruña, a menos de 20 minutos en coche”. E como terceiro obxectivo o plan sinala que como consecuencia do anterior “poténciase o núcleo urbano de Oza como único núcleo urbano do concello en detrimento do núcleo de Cesuras, en busca da mencionada centralidade”.
É no sexto punto dos obxectivos a acadar co plan no que se apunta ao “equilibrio territorial no nivel de equipamentos dotacionais e estándares, mellorando as dotacións no ámbito correspondente ao antigo concello de Cesuras”.
O concello estivo a piques de baixar dos 5.000 habitantes, obxectivo da fusión para obter máis cartos, e malia que a poboación remontou lixeiramente coincidindo coa pandemia, o PXOM prevé un estancamento poboacional
O plan de urbanismo agora a tramitación para Oza-Cesuras reflicte o carácter máis rural do municipio canto máis ao sur, no antigo territorio de Cesuras, a medida que se afasta das zonas máis poboadas da Coruña e Betanzos. Aínda así, todo o concello fusionado suma pouco máis de 5.000 habitantes, cifra que foi posta como obxectivo da fusión hai unha década xa que a partir dese punto os concellos reciben máis fondos.
Durante os últimos anos a poboación seguiu caendo no concello xa fusionado, como vén facendo na gran maioría dos municipios rurais do país. A 1 de xaneiro de 2020 chegou a só 5.096 habitantes, pero a poboación remontou lixeiramente no ano seguinte, coincidindo coa pandemia do coronavirus e as restricións asociadas que en moitos lugares freou o éxodo ás cidades e volveu poñer en valor a vida no rural. Malia a isto, o PXOM prevé un estancamento poboacional.