Representantes das nove formacións políticas do Estado español integradas na Alianza Libre Europea (ALE), mantiveron este martes unha reunión nas dependencias do Congreso dos Deputados, en Madrid, para analizar o traballo realizado no seo desta agrupación no presente exercicio. Ademáis, iniciaron as conversas en torno á conformación futura dunha candidatura conxunta ás próximas Eleccións ao Parlamento Europeo, que se celebrarán o vindeiro 25 de maio de 2014.
Á reunión asistiron o secretario xeral da Alianza Libre Europea, Jordi Solé, e a eurodeputada da coalición Europa dos Pobos-Verdes, Ana Miranda (BNG). Tamén participaron os nove representantes das formacións integradas en ALE: ERC, BNG, EA, Aralar, Bloc Nacionalista Valenciá, CHA, Nueva Canaria, PSM-Entesa Nacionalista, Partido Andalucista. Tamén estiveron presentes o director da Alianza Libre Europea en Bruxelas, Gunther Dauwen, e a súa coordenadora política, Eva Bidania.
Este mesmo martes Vilaweb especulaba coa posibilidade da conformación dunha grande candidatura nacionalista, da que formarían parte a meirande parte destas nove formacións, e outras coma o PNV e Compromís. Practicamente todos os grandes partidos nacionalistas do Estado, agás CiU e Coalición Canaria. Porén, esa mesma infomación recollía as dúbidas dalgún destes partidos, comezando por ERC, pendente dunha hipotética candidatura "polo dereito a decidir" con CiU. Ou de Compromís, que podería concorrer con Equo ou nalgunha candidatura de esquerdas. Vilaweb sinala en calquera caso que a primeira opción de ERC neste momento é a de repetir a coalición coa que concorreu hai 5 anos (con BNG, Aralar, EA, CHA...), coa incorporación de novas forzas, como Compromís ou o PSM.
