A Xunta suaviza as restricións nas terrazas da hostalaría e reduce o número de concellos en nivel alto

Terrazas xunto á praza de Abastos, en Compostela CC-BY-SA Xunta

Hemeroteca

O Goberno galego vén de anunciar a relaxación das restricións aplicadas á hostelaría, cando menos nos seus espazos exteriores. Despois da reunión do Comité Clínico que asesora á Consellaría de Sanidade, decidiuse aumentar a capacidade máxima permitida nas terrazas de bares e restaurantes e tamén do ocio nocturno. O obxectivo é fomentar a utilización destas zonas ao aire libre, nas que as posibilidades de contaxio son menores, axudando así ao sector da hostelaría a recuperar a súa actividade.

O obxectivo é fomentar a utilización destas zonas ao aire libre, nas que as posibilidades de contaxio son menores, axudando así ao sector da hostelaría a recuperar a súa actividade

As novas medidas entrarán en vigor na medianoite do venres ao sábado e veñen acompañadas dunha actualización dos distintos niveis aplicados a cada localidade en función da súa situación epidemiolóxica. A partir desa data non haberá ningunha localidade no nivel máximo e só ficarán 33 en nivel alto (ata agora eran 55). Entre eses concellos en nivel alto seguen estando A Coruña e Vigo, pero o resto das urbes pasarán a estar en nivel medio, unha categoría na que xa se atopaban Compostela e Ourense e na que pasan a estar tamén Ferrol, Lugo e Pontevedra.

Na hostalaría os cambios non afectan ao nivel máximo, pero si ao alto (a capacidade máxima das terrazas pasa do 50% ao 75%) e ao medio (a capacidade nas terrazas aumenta do 50% ao 100%)

Entre os cambios aplicados nas normas, destaca o aumento da capacidade máxima permitida en todos os niveis. Na hostalaría os cambios non afectan ao nivel máximo, pero si ao alto (a capacidade máxima das terrazas pasa do 50% ao 75%) e ao medio (a capacidade nas terrazas aumenta do 50% ao 100%). No ocio nocturno os principais cambios afectan aos niveis máximo e alto, nos que o interior de pubs e discotecas seguirá pechado ao público, pero nos que as terrazas poderán ter unha ocupación do 75%. Nos niveis medio e baixo increméntase o nivel de ocupación permitido no interior dos locais de ocio nocturno do 30% ao 50%.

 

Comezo da vacinación dos mozos e mozas de 14 a 16 anos

Cada vez é menor a media de idade dos pacientes que ingresan no hospital ou morren despois de contraer a COVID. Nestes momentos unha persoa de 16 anos está na UCI e nos últimos días faleceu unha muller de 56

Na rolda de prensa posterior ao Comité Clínico, o Conselleiro de Sanidade, Julio García Comesaña, destacou a mellora dos datos de incidencia en Galicia, destacando que por desgraza esta mellora aínda non se traduce nun descenso da ocupación hospitalaria e no número diario de falecementos. García Comesaña fixo un chamamento a "non baixar a garda" ante o virus, dado que se está a rexistrar un incremento dos contaxios entre a poboación máis vulnerable por idade (as persoas maiores de 80 anos) e, ademais, que cada vez é menor a media de idade dos pacientes que ingresan no hospital despois de contraer a COVID. Destacou, por exemplo, que nestes momentos está na UCI unha persoa de 16 e que nos últimos días faleceu unha muller de 56 anos.

En canto ao proceso de vacinación, o conselleiro de Sanidade subliñou os bos datos de Galicia e anunciou que a vindeira semana comezará a vacinación dos mozos e mozas entre 14 e 16 anos.

Entre os concellos en nivel alto seguen estando A Coruña e Vigo, pero o resto das urbes pasarán a estar en nivel medio

Un total de 33 concellos estarán a partir do sábado en nivel alto. Trátase de Fisterra, Laxe, Malpica, Muxia, A Coruña, Arteixo, Betanzos, Cee, Miño, Sada, Camariñas, Vimianzo, Cabana de Bergantiños, Pontedeume, Cabanas, Ares, Rábade, A Rúa, O Barco, O Grove, Meis, Bueu, Ponte Caldelas, Redondela,Tui, Vigo, Arbo, As Neves, Nigrán, Tomiño, O Rosal, Ponteareas e A Cañiza.

Ademais, 72 localidades situaranse en nivel medio. Os restantes 208 concellos estarán no nivel mínimo de restricións.

Despece

  • A incidencia da COVID continúa á baixa en Galicia, que suma seis mortes máis no último día

    © Sergas

    Sanidade notifica a detección de 597 novos positivos de COVID, moi por debaixo dos datos notificados o pasado mércores (722) e o mércores anterior (1.042)

    A Consellaría de Sanidade notifica este mércores a detección de 597 novos positivos de COVID, o que confirma a tendencia ao descenso da quinta vaga, iniciada hai unhas semanas. A cifra está moi por debaixo dos datos notificados o pasado mércores (722) e o mércores anterior (1.042). 

    A incidencia acumulada a 14 días descende ata os 415 casos por cada 100.000 habitantes, despois de ter acadado os 644 a finais de xullo. De igual xeito, baixa a incidencia a 7 días ata os 164 casos por cada 100.000 habitantes, menos da metade do máximo da quinta vaga (344 casos o pasado 27 de xullo).

    Este mércores o Sergas informa de seis novas mortes. No último mes faleceron 79 persoas en Galicia despois de ter dado positivo en COVID

    As malas novas seguen chegando a través da notificación de novos falecementos de persoas que se contaxiaran. Este mércores o Sergas informa de seis novas mortes, o que eleva a cifra total ata as 2.524. No último mes faleceron 79 persoas en Galicia despois de ter dado positivo en COVID.

    A ocupación hospitalaria comeza a baixar aos poucos, cun total de 322 persoas ingresadas con COVID, seis menos que o pasado mércores. O número de camas ocupadas nas UCI mantense nas 63, a cifra máis alta dende marzo.

    Nos últimos días o número de contaxios comezou a medrar na área sanitaria de Lugo, e na propia cidade lucense, o que podería indicar un cambio de tendencia

    Aínda que a incidencia acumulada descende na maior parte de Galicia, nos últimos días o número de contaxios comezou a medrar na área sanitaria de Lugo, o que podería indicar un cambio de tendencia. A incidencia acumulada a sete días pasou de 156 casos por cada 100.000 habitantes a 169, un leve ascenso nunha zona que -iso si- presenta cifras por debaixo da media galega.

    A área sanitaria con máis incidencia segue a ser a da Coruña (256 casos por cada 100.000 habitantes a sete días), pero con datos en rápido descenso nos últimos días.

    Fisterra, A Pobra do Brollón, Malpica de Bergantiños, Laxe e Betanzos continúan a rexistrar incidencias por riba dos mil casos por cada 100.000 habitantes

    Por concellos, Fisterra, A Pobra do Brollón, Malpica de Bergantiños, Laxe e Betanzos continúan a rexistrar incidencias por riba dos mil casos por cada 100.000 habitantes a 14 días. Rábade, Monterrei, Zas, Cabana de Bergantiños, Muxía e Corcubión achéganse tamén a ese indicador.

    En canto ás urbes, a incidencia acumulada segue a descender en todas elas, coa única excepción da cidade de Lugo, que aumenta de forma importante no último día. Haberá que agardar para comprobar se se está a producir un cambio de tendencia. En calquera caso, a cidade lucense mantense por debaixo das cifras da Coruña, Vigo ou Ferrol, as tres cidades con máis casos activos por habitante.

  • Marcos Pérez Pena

    Marcos Pérez Pena

    Marcos Pérez Pena (Montevideo, 1980). Tras ter traballado en Vieiros.com e outros medios, en 2012 formou parte do equipo que puxo en marcha Praza. Doutor en Xornalismo pola USC, analizou na súa investigación o papel da prensa en Galicia durante a Transición.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza