O TSXG adopta a medida cautelar solicitada por Adega de suspender as obras do parque eólico de Acibal,  na contorna de Moraña

A Sala do Contencioso-administrativo do Tribunal Superior de Xustiza de Galicia adoptou a medida cautelar solicitada pola asociación ecoloxista Adega de suspender as obras de construción do parque eólico Acibal (Amil, Moraña) autorizadas pola Dirección Xeral de Planificación Enerxética e Recursos Naturais da Xunta de Galicia. A medida ten como consecuencia a paralización inmediata das actuacións polo descubrimento de restos arqueolóxicos.

 A sala indica que a Administración "carece de cobertura" cando estando a executar as obras do parque prodúcese o achado de restos arqueolóxicos e non contesta os requerimentos de cesamento

 Para a Sala, “non se aprecia con evidencia que non concorra actuación material da Administración que carece da necesaria cobertura xurídica que lesiona dereitos e intereses lexítimos”, debido a que, “aínda que a administración actuante ten cobertura para construír o parque eólico porque conta con autorización administrativa para iso, con todo, carece de cobertura cando, estando a executar as obras do parque prodúcese o achado de restos arqueolóxicos (petróglifos e demais) e, ante as múltiples denuncias dos veciños, o Seprona e mais da asociación demandante, non se cuestiona -dado que non contesta os requirimentos de cesamento- sequera a decisión de suspensión de tales obras”, como lle posibilita a lei de Patrimonio Cultural de Galicia.

Os maxistrados indican que a perturbación para os intereses económicos promotora eólica, que cualifican de “loables”, non concorren neste caso, “por canto que os posibles danos pola paralización das obras de construción do parque que explotará no futuro son susceptibles de ser reparados”. 

A Sección Terceira tampouco entende que se ocasionen perturbacións aos intereses da Administración, “que representa os xenerais de desenvolvemento da enerxía eólica destinada a minorar os efectos do cambio climático”, “pois a paralización provisional a consecuencia dos achados dos restos de interese arqueolóxico non debería, polo seu carácter temporal, conlevarlle unha alteración ou trastorno de carácter grave”.

O Tribunal entende que o outorgamento da medida cautelar de paralización da actuación administrativa é preceptivo nos recursos contra as actuacións administrativas en vía de feito, como o presente caso.