A Associaçom Galega da Língua (AGAL) celebrou esta fin de semana unha asemblea para elixir un novo Consello para dirixir a entidade e fixar as súas liñas de acción para o vindeiro ano. Eduardo Maragoto, presidente da asociación nos últimos catro anos, recunca nesta responsabilidade, acompañado dunha ducia de persoas da candidatura "Polo novo consenso", encabezadas por Eliseu Mera como vicepresidente e Marcos Saavedra como secretario.
Eduardo Maragoto, presidente nos últimos catro anos, recunca nesta responsabilidade, acompañado de Eliseu Mera como vicepresidente e Marcos Saavedra como secretario
AGAL acordou o desenvolvemento de tres grandes liñas programáticas para o vindeiro ano, entre as que destaca o obxectivo de converter o ano 2020, no que Carvalho Calero será homenaxeado no Día das Letras, "nun punto de inflexión para o diálogo aberto sobre a relación entre o galego e a lingua portuguesa".
Ademais, AGAL aposta por "fortalecer os consensos, internos e externos" en relación con que a Lusofonía sexa "o espazo natural da lingua de todos e todas as galegas, máis alá de discrepancias conxunturais". Finalmente, a entidade traballará para "divulgar a vivencia reintegracionista como proveitosa, quer dende o punto de vista cultural, quer dende o persoal".
A asociación busca fomentar as vías de colaboración co conxunto da sociedade, "tecendo redes que faciliten a penetración da idea de comunidade galego-portuguesa", avanzando na converxencia co portugués a través do fortalecemento de grandes consensos sociais.
A asociación aposta por promover o portugués no ensino e fomentar as relacións galego-portuguesas no ámbito comunicativo, social e institucional
Unha das vías para facelo será a implementación de proxectos que permitan explorar ao máximo a Lei Paz Andrade, tanto no que atinxe á promoción do portugués no ensino como no campo das relacións galego-portuguesas no ámbito comunicativo, social e institucional.
Ademais de Eduardo Maragoto como presidente, o Consello conta con Eliseu Mera como vicepresidente, Marcos Saavedra como secretario, Romám Vilela como tesoureiro. Complétase con nove vogais: Valentim Fagim, Miguel Penas, Carme Saborido, Jon Amil, Teresa Pilhado, Graciela Lois, Luís Fontenla, Matias Rodrigues e Vítor Garabana.
