A organización destaca que a elección de Reija como gañadora "recoñece o labor dos medios públicos e a especial relevancia que os medios de comunicación cobran nunha situación de guerra como a de Ucraína"
"A única forma de reducir a propaganda nunha guerra é que haxa moitos xornalistas sobre o terreo", dicía nesta entrevista Mónica García Prieto, gañadora do Premio José Couso no ano 2013. O galardón á Liberdade de Prensa que todos os anos conceden o Colexio Profesional de Xornalistas de Galicia (CPXG) e o Club de Prensa de Ferrol é neste 2022 para Érika Reija, xornalista lucense da Televisión Española que abandonou hai uns meses a correspondencia de Moscova en resposta á aprobación dunha lei que criminaliza o traballo xornalístico en Rusia.
A gañadora foi elixida en votación aberta e secreta polos colexiados e colexiadas do CPXG e polos socios e socias do Club de Prensa. Nos vindeiros días, o Colexio de Xornalistas anunciará cando se vai realizar a entrega do premio, que habitualmente ten lugar en Ferrol nos primeiros días do mes de maio, coincidindo coa celebración do Dia Mundial da Liberdade de Prensa.
![](https://praza.gal/storage/uploads/unnamed-8998694.jpeg)
"Nun conflito como este, as e os xornalistas seguen a arriscar a liberdade e mesmo a vida para trasladar a información á sociedade, unha situación de especial risco para os e as freelance"
Reija era candidata ao premio xunto con Mònica Bernabé, Pablo González, Víctor Guerrero. A organización do galardón salienta que as catro candidaturas eran merecedoras do galardón e destaca que a elección de Érika Reija como gañadora "recoñece o labor dos medios públicos e a especial relevancia que os medios de comunicación cobran nunha situación de guerra como a de Ucraína".
"Nun conflito como este, as e os xornalistas seguen a arriscar a liberdade e mesmo a vida para trasladar a información á sociedade, unha situación de especial risco para os e as freelance, que suman aos perigos xerais o de non teren a cobertura directa de ningún medio", engade a organización
O Colexio de Xornalistas e o Club de Prensa de Ferrol quixeron facer unha mención especial á situación de Pablo González, detido e encarcerado por Polonia dende hai dous meses por exercer o seu traballo como xornalista
Neste senso, o Colexio de Xornalistas e o Club de Prensa de Ferrol queren facer unha mención especial á situación de Pablo González, detido e encarcerado por Polonia dende hai dous meses por exercer o seu traballo como xornalista, polo que foi acusado de "espionaxe". Neste proceso, no que o país pode imporlle unha pena de ta dez anos de prisión, o xornalista español viu mesmo negado ata hai uns días o dereito a contar cun avogado da súa elección. A organización do Premio José Couso solicita ás autoridades "que realicen todas as xestións oportunas para que o xornalista poida recuperar a súa liberdade o antes posible".
Érika Reija
O pasado 5 de marzo Reija abandonou Rusia tras a aprobación dunha nova lei que prevé sancións de ata 15 anos de cadea pola difusión de noticias consideradas "falsas" polo Goberno
Érika Reija López, nada en Lugo, é licenciada en Xornalismo por la Universidad Complutense de Madrid. Especializada no mundo árabe, en 2004 entrou a traballar en Televisión Española e foi enviada especial a diversos destinos, informando sobre a revolución da praza Tahrir en 2011 en Exipto, a caída de Gadafi en Libia ou o conflito entre Israel e Palestina.
No ano 2015 foi designada correspondente de Televisión Española en Rabat e en 2017 foi enviada a Moscova para ocupar a correspondencia da capital rusa. Porén, o pasado 5 de marzo abandonou Rusia tras a aprobación dunha nova lei que prevé sancións de ata 15 anos de cadea pola difusión de noticias consideradas "falsas" polo Goberno.
Reija súmase aos anteriores gañadores e gañadores do galardón: Manuel Rico (2021), Lorenzo Milá (2020), Defende a Galega (2019), Julia Otero (2018), Xosé Hermida (2017), Miguel Ángel Aguilar (2016), Jordi Évole (2015), Ricardo García Vilanova, Javier Espinosa e Marc Marginedas (2014), Mónica García Prieto (2013), o Consello de Informativos de TVE (2012), WikiLeaks (2011), Daniel Anido e Rodolfo Irago (2010), Rosa María Calaf (2009), Vidal Beneyto (2008), Jon Lee Anderson (2007), Le Monde Diplomatique (2006) e Ali Lmrabet (2005).