O Goberno galego asume “a posible necesidade” de ter que compensar ao máis dun cento de establecementos que identifica Turismo de Galicia
O Ministerio de Transportes publica este martes no Boletín Oficial del Estado (BOE) unha nova orde coa que modifica o listado de 37 aloxamentos esenciais en Galicia que estableceu o pasado mércores e amplíao, eliminado algúns dos anteriores, a 48. Ao tempo, a Xunta reclama que se teña en conta o seu propio listado, feito público despois do primeiro creado polo ministerio e que cualifica como “dinámico” e que suma máis dun cento de establecementos, para os que asume “a posible necesidade” de ter que compensalos pola súa apertura.
No BOE o ministerio admite que as novas medidas establecidas desde o pasado mércores motivaron “que determinados aloxamentos turísticos inicialmente incluídos non poidan prestar os servizos con total garantía”, e muda o anterior listado de 37 establecementos en Galicia por outro de 48 no que xa non aparecen por exemplo, como si estaban no primeiro, instalacións públicas como o albergue do Monte do Gozo ou a Escola Superior de Hostelería de Galicia.
Nin ministerio nin Turismo de Galicia indican que criterio empregaron para elaborar as súas listas
Ao tempo, este mesmo mércores a Xunta publica no DOG diversas novas medidas arredor da crise do coronavirus entre as que inclúe non unha decisión senón unha “posta de manifesto” por parte da Consellería de Cultura e Turismo sobre os aloxamentos esenciais. A Consellería, nun texto en castelán incluído na versión en galego do DOG [un día despois publicouse unha corrección de erros traducindo o texto ao galego], lembra que conta co seu propio listado de establecementos cunha “actual dispoñibilidade a día de hoxe de 113” e “manifesta a necesidade de que se teña en conta o carácter dinámico da lista de establecementos dispoñibles, que se actualiza diariamente na páxina web de Turismo de Galicia”, onde a primeira hora deste martes aparecían 111, para que se teña en conta o seu carácter esencial “aos efectos dunha eventual modificación” da orde ministerial do pasado mércores.
Porén, esa é a orde que o ministerio modifica este mesmo martes, ao tempo da petición da Xunta, sen ter en conta ese listado de Turismo de Galicia no que, por exemplo, segue aparecendo o Monte do Gozo ou o hotel da estación de montaña de Manzaneda, impulsada a medias pola Xunta e a Deputación de Ourense.
A Xunta tamén “toma razón da posible necesidade da sinatura de documentos de cesión temporal de establecementos [...] nos que se asuma, no seu caso, a compensación dos gastos derivados da apertura pola urxencia da situación e polas dificultades para a posta en marcha de establecementos pechados e necesarios nas actuais circunstancias”. A Xunta non indica que criterio seguiría para esas compensacións nin o que empregou para elaborar a súa lista de máis dun cento de aloxamentos, como tampouco o fixo o ministerio coa súa inicial de 37 nin coa actual de 48.
