O certame promove a realización de vídeos curtos entre os que se elixirán os dous mellores, que recibirán cadanseu premio económico
O Concello de Lugo vén de poñer en marcha un concurso na plataforma de vídeos curtos Tik Tok que busca concienciar e sensibilizar sobre a trata de mulleres con fins de explotación sexual. O certame promove a realización de vídeos curtos entre os que se elixirán os dous mellores, que recibirán cadanseu premio económico, o primeiro dotado con 200 euros e un segundo con 100 euros.
A participación, que é gratuíta e online, estará aberta ata o 23 de setembro de 2022, coincidindo co Día Internacional contra a Explotación Sexual e a Trata de Mulleres, e as persoas gañadoras daranse a coñecer o 30 de setembro de 2022 tras o fallo do xurado, que estará formado por representantes do Concello de Lugo, a Casa da Muller de Lugo e personalidades do sector audiovisual, entre outros.
Os vídeos deben abordar calquera tema relativo á loita pola igualdade e faga visible a explotación sexual e o tráfico de mulleres: proxenetismo, vulnerabilidade da muller prostituída, normalización aberrante do consumo da prostitución...
A concelleira de Muller e Igualdade, Silvia Alonso, explicou que os vídeos que se presenten ao concurso deben abordar calquera tema que concirna á loita pola igualdade e faga visible a explotación sexual e o tráfico de mulleres (proxenetismo, vulnerabilidade da muller prostituída, normalización aberrante do consumo da prostitución, etc.). Para formar parte do certame só hai que subir un vídeo á rede TikTok, co cancelo do concurso (#Lugoporlaigualdad) e cubrir o formulario de inscrición que se atopa neste enlace, onde tamén se poden consultar as bases.
A duración máxima das obras será dun minuto e pódense empregar todas as posibilidades creativas que proporciona a propia rede social, sendo imprescindible que a conta sexa pública. Poderán participar todas aquelas persoas que residan, traballen, estuden ou naceran en Lugo maiores de 14 anos e non serán admitidas obras con linguaxe xenófoba, machista, homófoba, racista, violenta ou de incitación ao odio.
A duración máxima das obras será dun minuto e pódense empregar todas as posibilidades creativas que proporciona a propia rede social
Silvia Alonso subliñou que con esta iniciativa “queremos que a cidadanía nos ofreza a súa versión da trata, que é tamén violencia de xénero”. A concelleira lembrou que as mulleres son as principais vítimas da trata de persoas, neste caso especialmente con fins de explotación sexual para o exercicio da prostitución. Segundo un informe do 2020 elaborado pola UNODC (Oficina de Nacións Unidas contra a Droga e o Delito), o 65% das vítimas de trata detectadas son mulleres, u 46% maiores de idade e un 19% nenas.