A presión exercida pola convocatoria de folga conseguiu que a Administración retirase o documento imposto na mesa sectorial do 17 de outubro
A convocatoria de folga continúa plenamente activa. As organizacións sindicais do comité de folga —CIG, CSIF, CCOO e UGT— mantiveron este venres “unha intensa reunión coa Consellería”, segundo indicaron, na que, grazas “á presión exercida pola convocatoria de folga, conseguiron que a Administración retirase o documento imposto na mesa sectorial o pasado 17 de outubro”.
Durante esta reunión, informan os sindicatos, a Administración comprometeuse a non continuar coa reconversión de máis prazas de FEAP a partir de 2026, así como a convocar en xaneiro o concurso específico de enfermería familiar e comunitaria, demandas que as organizacións sindicais levan tempo reclamando.
O sindicatos lamentan que a xuntanza durou máis de seis horas sen que a Administración ofrecese propostas reais nin medidas concretas. A negociación retomarase o vindeiro luns
A pesar destes avances, a xuntanza prolongouse durante máis de seis horas sen que a Administración ofrecese propostas reais nin medidas concretas, “limitándose unha vez máis a falar de prazos sen asumir compromisos efectivos”, segundo subliñan as organizacións sindicais, que denuncian esa falta de resposta e reiteran que “sen avances claros non haberá acordo posible”.
“A negociación retomarase o vindeiro luns e a convocatoria de folga continúa plenamente activa ata acadar solucións satisfactorias para todo o persoal afectado”, informaron onte desde os sindicatos.
Desde a Xunta subliñan que “a Consellería de Sanidade e os representantes dos traballadores veñen de abrir un proceso de negociación para a atención primaria"
Desde a Xunta pola súa banda, informaban este venres á tardiña de que “a Consellería de Sanidade e os representantes dos traballadores veñen de abrir un proceso de negociación para a atención primaria".
Para avanzar nese proceso, explican, a Consellería ofreceu, como punto de partida, a retirada do documento de medidas para a atención primaria que se propuxo á Mesa Sectorial do pasado 17 de outubro en aras de facilitar un marco de negociación cos representantes dos traballadores.
A Consellería de Sanidade indica que “confía en que o marco de negociación aberto cos representantes dos traballadores permita acordar solucións para garantir a asistencia nos centros de atención primaria no contexto de déficit de profesionais e evitar a celebración da folga convocada para o presente mes de novembro”.
