Os médicos galegos e persoal sanitario estoupan contra o bono de 250 euros para consumo de produtos turísticos que Feijóo anunciou para os profesionais da sanidade, residencias e centros de atención á discapacidade o pasado venres.
O Consello Galego de Colexios Médicos amosa o seu "máis rotundo rexeitamento" á "singular medida" do bono: "Queremos dignidade, non frivolidade"
O Consello Galego de Colexios Médicos, que reúne máis de 13.000 facultativos e representa os catro colexios provinciais, reclamou nun comunicado "dignidade, non frivolidade" e amosou o seu "máis rotundo rexeitamento" ante unha "singular medida". "A nosa deontoloxía e o noso xuramento hipocrático impídenos aceptar propinas como esta", engade o texto.
Así, advirten de que os profesionais reclaman "estabilidade no traballo, non contratos temporais, e recursos suficientes" para desenvolver o seu labor "nas mellores condicións de seguridade e eficiencia". E lembran que durante a pandemia cumpriron coa súa obriga cunha entrega "ao límite" e arriscando a súa saúde.
Os médicos insisten en que o que reclaman é "estabilidade no traballo, non contratos temporais, e recursos suficientes"
"Pedimos que a Administración nos trate coa consideración debida e reforce o noso sistema sanitario para facer fronte a continxencias como a que vivimos e estamos a vivir", din os médicos galegos, que amosan a súa "solidariedade" co sector hostaleiro e turístico ao que se pretende axudar cos bonos destinados ao persoal sanitario. Para o Consello Galego de Colexios Médicos, hai outros "medios" para "socorrer" este sector "sen caer en medidas pouco serias e que soan a improvisación".
A crítica non quedou só aí. A Confederación Estatal de Sindicatos Médicos (CESM) amosou tamén o seu rexeitamento a unha "propina" que considera unha "tomadura de pelo". "Se realmente quere recoñecer o inxente labor desenvolvido por este colectivo na loita contra a covid, reverta todos os recortes salariais, sociais e asistenciais que perdemos por mor da crise de 2009", dille a organización a Feijóo.
O CESM cualifica de "propia" e "tomadura de pelo" o bono e pide a Feijóo que "recoñeza" o labor dos profesionais "revertendo os recortes" aplicados desde 2009
Para o CESM, o bono de 250 euros é "indignante" e "produce o efecto contrario ao perseguido en plena campaña electoral". Así, o sindicato lémbralle ao Sergas e á Consellería de Sanidade que non fixeron caso de moitas das medidas reclamadas durante anos e mesmo pactadas para mellorar as condicións do persoal, como a fin da precariedade, a transparencia na lista ou as melloras na asistencia aos pacientes. Iso é o necesario, din, se as autoridades "realmente queren ter un xesto de recoñecemento".
O CESM aposta por unha "compensación" para o persoal sanitario que traballou durante a crise sanitaria "cunha implicación e entrega moi superior ao esixible" pero, aclaran, "por sentido do deber". "O mellor e máis xusto recoñecemento sería a recuperación dos dereitos perdidos e o cumprimento dos compromisos" para acabar coa precariedade laboral e mellorar a calidade asistencial, din.
Ademais, desde Enfermeiras Eventuais en Loita, colectivo que mobiliza e se mobiliza en representación de máis de 6.000 profesionais en precario do Sergas, din alegrarse de que outros colectivos "se sumen agora" a un rexeitamento que levan tempo facendo contra o que consideran "migallas".
"Dende o inicio das nosas reivindicacións pedimos condicións dignas e non incrementos salariais nin doutro tipo de retribución. De feito non somos o único colectivo que así o fai. Todas as que loitamos pola sanidade pública coincidimos en moitas das nosas reclamas, que non teñen relación co incremento dos soldos", advertían xa hai tempo nun comunicado.
