Despece

• Unha vintena de localidades, en risco de perder investimentos e concelleiros

  Cada ano, a publicación actualizada dos datos do Padrón de poboación é moi agardada por un gran número de concellos, sobre todo aqueles que se atopan preto dalgunhas fronteiras que son moito máis que simbólicas. Estar por riba ou por debaixo deses límites pode supoñer, sobre todo, maior ou menor financiamento, ademais da posibilidade de elixir máis ou menos edís (se ese ano hai eleccións municipais) e nalgúns casos a posibilidade de acceder a máis competencias.

  Aínda que a preocupación é, principalmente, económica. A parte que os concellos reciben dos tributos recadados polo Estado distribúese nun 75% en función do seu número de habitantes, ponderados por uns coeficientes multiplicadores que teñen nos 5.000, 20.000 e 50.000 habitantes os seus límites. Así, para os concellos de menos de 5.000, o coeficiente é 1; porén, se supera esa poboación pasa a ser de 1,17; e se pasa por riba dos 20.000 chega xa a 1,3. Un mellor financiamento redunda en mellores servizos, e as localidades que se atopan ao bordo de superar (ou de perder) algún destes niveis esfórzanse por ficar por riba.

  O límite dos 20.000 é, polo tanto, moi importante e implica tamén unha notable diferenza no número de concelleiros escollidos (17 se o concello ten menos habitantes e 21 se supera esa cantidade). Na actualidade, A Estrada e Lalín sitúanse por riba desa cantidade, aínda que cunha marxe escasa. A Estrada está a experimentar unha importante perda poboacional, e podería perder ese nivel de continuar esa tendencia. Mentres, Lalín leva ano no mesmo límite, pero a mellora experimentada dende o 2015 garante de momento o mantemento do seu actual estatus. Mentres, O Porriño e Moaña sitúanse inmediatamente por debaixo, sendo a localidade porriñesa a que se atopa máis preto, despois de gañar case mil habitantes nos últimos tres anos.

  O límite dos 5000 aparece tamén sinalado como especialmente relevante, polo que implica de diferenza de financiamento, competencias e concelleiros elixidos (11 ou 13).  Son moitos os concellos que se atopan preto deste nivel, comezando por Neda, Outeiro de Rei, Ribadumia, Vedra, Ribadavia, Cerceda ou Castro de Rei, entre os 5.112 e os 5.011 habitantes en 2018. Lixeiramente por debaixo, aparece A Illa de Arousa (4.958). 

  Entre estas localidades pódese diferenciar entre as que están a experimentar un rápido despoboamento (Ribadavia, Neda, Cerceda, Castro de Rei) e as que levan anos cunha cifra de habitantes relativamente estable, sempre roldando esta cifra dos 5.000 (Ribadumia, Outeiro de Rei, A Illa e Vedra), con maiores posibilidades de resistir por riba deste límite.

  Hai outros límites poboacionais importantes, sobre todo no que se refire sobre todo ao número de concelleiros que se elixirán nas eleccións do vindeiro mes de maio. En calquera caso, o número de edís que corresponderán a cada concello dependerá aínda dos novos datos de poboación correspondentes ao inicio do ano 2019.

  Así, no límite dos 10.000 habitantes (que determina a diferenza entre as corporacións municipais con 13 ou 17 concelleiros) aparecen Vilanova de Arousa, As Pontes de García Rodríguez, A Guarda e Foz (lixeiramente por riba) e Ribadeo, Caldas de Reis, Xinzo de Limia e Salvaterra de Miño (lixeiramente por debaixo). A Guarda (1.013 habitantes e con tendencia decrecente) podería perder este nivel, que acaba de gañar Foz e que probablemente perderá tamén definitivamente Xinzo de Limia.

  Mentres, Crecente, Boimorto, Nogueira de Ramuín, Antas de Ulla e O Valadouro están preto de perder o límite dos 2.000 habitantes (pasando de 11 a 9 edís), un límite que xa perderon Monfero, Vilardevós, A Merca, Vilamarín, A Peroxa e Oímbra. Finalmente, no límite dos 1.000 habitantes (a diferenza entre ter 7 ou 9 edís) resisten de momento San Amaro, A Mezquita, Pedrafita do Cebreiro, Ourol, Folgoso do Courel e Castrelo do Val. Pola contra, xa caeron por debaixo A Arnoia, Beariz, Ribas de Sil, Baltar e Verea.