A Plataforma de Afectados polo Vertedoiro Santiago-Miramontes solicita que a Fiscalía investigue o incendio acontecido este luns nas instalacións de Grixoa, ao norte da capital galega. A plataforma cidadá, que leva anos loitando contra as presuntas e continuas irregularidades dos xestores, insisten tras este novo incidente en advertir do "risco para a saúde, o silencio administrativo dos organismos competentes que velan polo Medio Ambiente e o desamparo" que din sentir como veciñanza.
A plataforma de afectados pide á Fiscalía que interveña e relata que veciñanza sufriu "proído nos ollos e na gorxa" ao respirar o fume do incendio
A plataforma explica que, a falta dos informes dos bombeiros e da policía, varias testemuñas aseguraron que era "insoportable" respirar o fume que durante varias horas saíu este luns do vertedoiro e que "provocou proído nos ollos e na gorxa". O colectivo pedirá toda a documentación das autoridades do incidente tras advertir de que as empresas xestoras do lixo estiveron "empregando bulldozer e maquinaria pesada para soterrar e apagar" as lapas. Xa onte, veciños advertían da posibilidade de que o lume queimase unha zona onde se acumula amianto.
Ademais, a plataforma instará a Consellería de Medio Ambiente a que faga "as investigaciónbs oportunas" e tome as "medidas necesarias para que este tipo de incidentes non se volvan repetir". O colectivo lembra que os informes que agora debullarán as causas e as consecuencia do incendio sumaranse aos que xa obran en poder da Fiscalía de Medio Ambiente relativos a este vertedoiro, que propiciaron a presentación en 2019, por parte da mesma, de dúas querelas trasladadas aos xulgados contra as empresas xestoras por mor de incumprimentos constatados: Sertego Servicios Medioambientais, SL e Tecnosolos Galaicos, SL.
Os informes que aclararán as causas do incendio sumaranse aos que xa ten a Fiscalía de Medio Ambiente, que pescuda irregularidades na instalación
A preocupación da plataforma, á vista das fotografías e vídeos tomados, está preocupada "pola posibilidade de que a impermeabilización do vaso do vertedoiro, se puidese ver alterada polo incendio". E lembran que, tal e como se recolle na denuncia da Fiscalía, a cantidade de materia orgánica que está depositada no vaso é moi superior ao 10% permitido e recollido no proxecto construtivo do vertedoiro.
"Este límite máximo do 10% de entrada de materia orgánica é unha cota de seguridade sobre a que se asentan os cálculos para o deseño do sistema de desgasificación deste vertedoiro. Notar que, estudos técnicos relativos ao deseño dos sistemas de desgasificación en vertedoiros destacan que, un sistema de desgasificación insuficiente para a evacuación de gases producidos pola descomposición de materia orgánica propicia a formación de bolsas de gas que poden derivar en incendios ou explosións", explican.
Todo, lembran, nunhas instalacións a medio quilómetro de casas habitadas. Así, piden á Fiscalía de Medio Ambiente que entre de oficio na investigación do que é o "cuarto incendio" no vertedoiro.