O Culturgal pechou este domingo a súa décima edición cun novo éxito de público e de participación do tecido cultural galego. Máis de 14 mil persoas pasaron entre o venres e o domingo polo Pazo da Cultura de Pontevedra, unha cifra lixeiramente inferior á do ano anterior, por mor dun leve descenso na asistencia durante o sábado. Pola contra, destacou a afluencia masiva durante a tarde do domingo e a consolidación do venres como xornada dirixida fundamentalmente a profesionais.

Esta edición de 2017 foi a terceira e última baixo a presidencia de Manuel Bragado. A directiva da Asociación Culturgal escollerá en breve nova presidencia. No remate da décima edición, a feira anunciou xa as datas de celebración en 2018: será do 30 de novembro ao 2 de decembro.

Nesta décima edición destacou a presenza de Portugal como cultura convidada. "A integración da cultura portuguesa tanto no programa de actividades como na relación de expositores, a través do acordo coa Direção Regional de Cultura do Norte, foi un acerto de cara a estabilizar a presenza de axentes do país veciño na Feira", destaca a dirección do Culturgal A feira acolleu a sexta sesión das Conversas Nortear que promoven o coñecemento da cultura entre Galicia e o Norte de Portugal a partir de redes de colaboración entre os dous territorios. Moderados polo gañador da segunda edición do Premio Literario Nortear para a mocidade escritora, Rui Cerqueiro, os escritores Miguel Sande e Virgínia do Carmo dialogaron no Pazo da Cultura de Pontevedra sobre literatura, a forza creativa que os impulsa, as súas respectivas traxectorias profesionais e os seus proxectos.

Tamén se fai fincapé na boa acollida do Espazo Arte Contemporánea, que se estreou neste 2017, que "superou as expectativas" e supuxo a entrada das artes plásticas á par que o resto dos sectores presentes na Feira. Neste senso, foi igualmente unha edición marcada polo falecemento do pintor Manuel Moldes, renovador atlántico de Pontevedra, a quen a Feira rendeu homenaxe na tarde do domingo nun acto presentado polo artista Antón Sobral, que contou coa presenza de representantes de distintas institucións, entre eles o alcalde de Pontevedra, Miguel Anxo Fernández Lores.

De igual xeito, o Culturgal acolleu a presentación da vindeira edición do Salón do Libro de Pontevedra -que terá como lema “Mulleres de Conto”- e do seu cartaz, deseñado por Ana Villegas, gañadora do certame internacional convocado polo Salón a tal fin. No Salón, que vai xa polas 19 edicións, destaca a colaboración establecida con México que, será o país convidado en 2018: “É unha potencia cultural de primeira magnitude que conta cunha grande estrutura de consumo da lectura e é tamén a plataforma latino-americana para lanzar cultura ao resto do continente. Imos aproveitar as sinerxias", destacou a concelleira pontevedresa de Cultura, Carme Fouces.