A Escola Superior de Arte Dramática de Galicia representará aos centros de artes escénicas do Estado no congreso que a entidade da UNESCO celebrará en Dubai
A Escola Superior de Arte Dramática (ESAD) de Galicia entra a formar parte do Instituto Internacional do Teatro da UNESCO e convértese no primeiro centro destas características de todo o Estado con participación nesta selecta organización das artes escénicas dependente da institución de Nacións Unidas centrada na transmisión da cultura, da educación, da ciencia e das comunicacións.
A ESAD de Galicia, situada no barrio vigués de Navia, foi admitida no Instituto Internacional do Teatro (ITI) o pasado 10 de maio despois dun proceso que comezou hai máis dun ano a través do Departamento de Mobilidade e Transición, que ten impulsado o intercambios de profesorado con prestixiosas institucións de educación europeas. A escola está agora inmersa nas probas de admisión para o curso 2021/2022, coas inscricións abertas ata ás 14.00 horas do 17 de xuño.
O Instituto Internacional do Teatro é a organización máis grande do mundo para as artes escénicas
O profesor da ESAD Fernando Llera foi quen iniciou o proceso de admisión no ITI, que funciona desde 1948 e hoxe é a organización máis grande do mundo para as artes escénicas, con máis de 90 centros distribuídos en todos os continentes. O recoñecemento da UNESCO chega tamén grazas á participación da escola galega no Erasmus+, un programa de intercambio europeo no que alumnado e docentes doutros países veñen a Galicia para completar a súa formación e viceversa.
O vindeiro encontro internacional do ITI terá lugar en Dubai no ano 2022, a onde acudirá unha comitiva da ESAD de Galicia xunto co Instituto de Danza Alicia Alonso, a outra escola que forma parte do ITI en España, que está integrada na Universidad Rey Juan Carlos de Madrid. Neste congreso, no que participarán 87 países, a ESAD será a voz das escolas superiores de arte dramática do Estado.
O Instituto Internacional do Teatro procura a integración das artes escénicas en todos os niveis da educación, defende unha financiación axeitada para os proxectos, considera o teatro como unha ferramenta de construción e desenvolvemento de comunidades máis xustas e asertivas, e coida da preservación do patrimonio material e inmaterial ligado ás artes.
Coa entrada no ITI, a ESAD de Galicia pasa a formar parte da Rede de Educación Superior en Artes Escénicas deste programa educativo da UNESCO, onde os países integrantes toman decisións que repercutirán nos Estados dentro de Nacións Unidas.
