A reivindicación dos dereitos sociais centra os actos do Día de Rosalía

Fragmento do cartel do Día de Rosalía 2019 © AELG

Hemeroteca

"A roupa de cote puñéronma en tiras" (en A xustiza pola man, Follas novas), "embargaránnos todo" (en “-Escoitá: os algoasiles”, Por que?, Follas novas), "que se amargo pan vos ganan / dádesllo envolto en veneno" (en “Castellanos de Castilla”, Cantares gallegos), "en errantes hordas" (en “Probe Galicia, non debes”, A gaita gallega, Cantares gallegos). A denuncia social e a reivindicación dos dereitos individuais e colectivos están presentes en toda a obra de Rosalía de Castro e niso fará fincapé o Manifesto do Día de Rosalía deste 2019, impulsado pola Asociación de Escritoras e Escritores en Lingua Galega (AELG).

 Traballadoras e traballadores da CRTVG lerán poemas de Rosalía no Panteón de Galegos Ilustres

As agresións sexuais, os desafiuzamentos, a explotación laboral, os éxodos e os refuxiados... todos estes temas estarán presentes no texto que este domingo 24 de febreiro, aniversario do nacemento da poeta. O acto central terá lugar no Panteón de Galegos Ilustres (Santiago de Compostela) ás 12 horas, coa presentación do manifesto da AELG a cargo de Ana Romaní e coa lectura de poemas rosalianos a cargo de traballadoras e traballadores da CRTVG.

O manifesto, redactado pola propia Ana Romaní, enlaza a través dos poemas da autora a denuncia social realizada por Rosalía no século XIX coas problemáticas existentes no século XXI: "Escrito en medio de todos-los desterros/ Manifesta que sabe que non a escoitan/ Do meu dor sin igual i a miña afrenta traidora se mofaban. Prende o computador, algún dispositivo. Ladran/ Manifesta que o poema é o lugar onde a voz afía a sombra/ Indóciles nos camiños desertos eses versos/ Cantos de independencia e liberdade. Manifesto/Acción que se inunda e anega. Cantarte hei".

 A AELG propón, ademais, que nesta data a cidadanía agasalle un libro en galego e unha flor

Non será o único acto neste Día de Rosalía, que se espalla por todo o país con lecturas, homenaxes e outras actividades, entre as que destacan as que ao longo de toda esta semana se levarán a cabo nos centros de ensino. A AELG propón, ademais, que nesta data a cidadanía agasalle un libro en galego e unha flor. Ademais, a entidade continúa a impulsar mocións nos concellos para que declaren o 24 como Día de Rosalía de Castro, algo que dende o 2011 xa fixeron medio cento de localidades e as deputacións da Coruña, Pontevedra e Lugo.

 

O 'Caldo de Gloria'

A Fundación Rosalía de Castro conmemora o 24 de febreiro chamando á participación en dous eventos: unha grande Alborada, coa colaboración da Asociación de Gaiteiros e Gaiteiras Galegas, e o Caldo de Gloria, iniciativa á que xa se sumaron numerosos colexios, restaurantes e os concellos de Padrón, Compostela, Ames, Brión, Rois, Teo, Rianxo, A Guarda, Celanova, Arzúa e Ponteceso.

O Caldo de Gloria é unha iniciativa inspirada no poema “Miña casiña, meu lar” na que a poeta explica como facer un caldo humilde e no que se relata a épica diaria da supervivencia protagonizada por unha muller. Comezou a realizarse con éxito en 2017, cun seguimento masivo en Padrón, e en 2018 xa se converteu nun evento seguido a nivel galego. 

A Fundación Rosalía de Castro impulsa a preparación do Caldo de Gloria e tamén unha Alborada a cargo de grupos de gaiteiros/as

Nesta terceira edición, a encargada de preparar o Caldo de Gloria na Casa-Museo da poeta (ás 19.30 horas do día 24) será a escritora Ledicia Costas, Premio Nacional de Literatura infantil e xuvenil en 2015, pola súa obra Escarlatina, a cociñeira defunta. "Queremos que en lugares públicos, coma os comedores escolares ou os locais de hostalería, ou tamén no ambiente familiar e íntimo, Galicia se lembre de Rosalía a través da nosa gastronomía popular e das leccións que nos dá a protagonista do poema: como sobrevivir e mesmo ser feliz a pesar da penuria e das adversidades", destaca a entidade.

Ademais, a Fundación recupera a celebración da Alborada, na que participaran 70 grupos de gaiteiros en 2013 no 150 aniversario da publicación de Cantares gallegos. A iniciativa conta coa colaboración da Asociación de Gaiteiros e Gaiteiras Galegas. E a Fundación Rosalía de Castro fai un chamamento "a todos os gaiteiros e gaiteiras de Galicia (e non só: tamén a outros músicos: sexan pandereteiras, requinteiras, tamborileiras, etc.) para dar unha alborada de gloria na súa honra" interpretando a Alborada de Rosalía, peza escrita pola propia autora.

Outros actos

  • A Coruña: A AELG e a A. C. Alexandre Bóveda realizan unha lectura pública da obra de Rosalía, o domingo 24 de febreiro, ás 18:00 horas, diante do teatro que leva o seu nome, na rúa Rego de Auga, o Teatro Rosalía de Castro.
  • Vigo: O 24 de febreiro, ás 18:00 horas, terá lugar unha ofrenda floral na imprenta Juan Compañel (Rúa Real, 12), e posteriormente terá lugar unha ruada até o local da Federación de AA. VV. Eduardo Chao (Praza da Princesa, 7, 2º).
  • Lugo: AELG, Deputación e Concello de Lugo organizan unha lectura pública da obra da autora. Será o domingo 24 ás 13 horas no Parque Rosalía de Castro.
  • Arteixo, Ames, Betanzos, Boiro, Cervo, Cospeito, Fisterra, Guitiriz, Outeiro de Rei ou Santiago de Compostela, entre outras localidades, acollerán tamén actos nesta data. Pódense consultar todos na axenda elaborada pola AELG.

Despece

  • Semana de Rosalía en Compostela: a poeta bótase ás rúas da capital galega

    Martiño Noriega, con Anxo Angueira e Xosé Manuel Durán na presentación da Semana de Rosalía en Compostela © Concello de Santiago

    Rosalía na súa cidade e barrio natais. Ou, o que é o mesmo, en Santiago e concretamente no barrio do Ensanche, onde se atopa a Praza de Vigo, en cuxa contorna estaba o Camiño Novo, no antigo Concello de Conxo, onde naceu Rosalía de Castro. O Concello compostelán connmemora neste 2019 o 182º aniversario do nacemento da poeta coa Semana de Rosalía en Compostela, un programa de actividades que chegará a finais de mes e que implica o propio consistorio, pero tamén ao tecido hostaleiro e comercial do Ensanche e Conxo.

    O presidente da Fundación Rosalía, Anxo Angueira, e mais o seu homólogo da asociación veciñal Raigame, Xosé Manuel Durán, presentaron este martes xunto ao alcalde compostelán, Martiño Noriega, unha programación rosaliana "pensada para reivindicar a figura de Rosalía e os seus vencellos con Santiago". De aí, detalla o rexedor, que se procure "facelo coa participación da cidadanía, do tecido asociativo, dos colexios, das persoas maiores e do público infantil".

    Boa parte das actividades da Semana de Rosalía en Compostela sitúanse nos barrios do Ensanche e Conxo, en cuxa contorna naceu Rosalía de Castro

    Unha semana cultural dedicada a Rosalía en colexios da cidade, poemas para as persoas que fagan as súas compras en comercios do Ensanche, degustacións do Caldo de Gloria en locais de hostalería ou mostras e debates sobre a obra rosaliana na rede Rede de Centros Cívicos figuran tamén nun programa que inclúe lecturas escenificadas de textos da autora. Correrán ao cargo da actriz Ana Ponte e o actor Diego Freire en sete dos centros cívicos.

    Senllos concertos de Amancio Prada na Igrexa de San Fernando e de Uxía no Centro Cívico Aurelio Aguirre, ambos o día 23, son outros dous dos actos previstos dunha semana de Rosalía que terá o propio 24 de febreiro como xornada central. O día comezará cunha ofrenda floral ante a escultura dedicada a Rosalía na Praza de Vigo en conmemoración do seu nacemento e outra, na emblemática estatua situada na Alameda dende hai máis dun século. Un acto institucional no Hostal dos Reis Católicos dará paso, xa na tarde, aos actos previstos na Casa da Matanza, en Padrón.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza