Francisco Pillado González traballou como contable pero a súa gran paixón foi a fotografía. Este mércores a súa familia entregou á Real Academia Galega unha escolma de dúas mil imaxes , que pasarán a estar custodiadas pola institución, dado o seu valor documental e patrimonial

Francisco Pillado González (1892-1977) traballou como contable pero a súa gran paixón foi a fotografía. Entre os anos 20 e 70 do pasado século rexistrou milleiros de imaxes, principalmente na cidade da Coruña e, sobre todo, inmortalizando escenas da vida cotián. Este mércores a súa familia entregou á Real Academia Galega unha escolma de dúas mil imaxes, que pasarán a estar custodiadas pola institución, dado o seu valor documental e patrimonial. 

No acto de entrega participaron en representación da familia Julia Tarrío Pillado e Marga Tarrío Pillado, netas do fotógrafo. Julia destacou que lembra sempre o seu avó "coa cámara colgada do pescozo, era como unha parte máis do seu corpo”. Así mesmo, subliñou que “o noso avó era un gran conversador, moi humano e próximo, interesáballe realmente a vida da xente que retrataba”. 

Francisco Pillado González foi pai do xornalista Francisco Pillado Rivadulla, director de La Voz de Galicia entre 1968 e 1977 e avó do editor Francisco Pillado Maior -presidente de honra da Fundación Praza Pública-, finado hai catro anos.

Na colección hai paisaxes urbanas da Coruña e outros escenarios de vilas próximas como Corme ou Betanzos e tamén espazos portuarios, buques e velames. Pero destacan sobre todo os retratos, moitos deles de mariñeiros, lavandeiras ou labregos

Francisco Pillado González foi un dos máis destacados fotógrafos afeccionados que se agruparon arredor da Sociedad Fotográfica Coruñesa, da que foi vicepresidente. A prensa da época deixa constancia dos diversos premios cos que foi recoñecido e das exposicións nas que participou canda outros amadores. A colección que a RAG pasa a custodiar está composta por unhas 2.000 placas e negativos fotográficos e uns 100 positivos en papel, así como un filme e un visor estereoscópico. 

Na colección hai paisaxes urbanas da Coruña e outros escenarios de vilas próximas como Corme ou Betanzos e tamén espazos portuarios, buques e velames. Pero destacan sobre todo os retratos, moitos deles de mariñeiros, lavandeiras ou labregos. “Era un gran conversador, moi humano e próximo, interesáballe realmente a vida da xente que retrataba. Temos a certeza de que a xente que posou o fixo despois de fumaren varios pitos xuntos e unha longa conversa, non dende unha actitude paternalista senón dende o interese verdadeiro”, destaca a súa neta.

A súa neta Julia di que lembra sempre o seu avó "coa cámara colgada do pescozo, era como unha parte máis do seu corpo”. Así mesmo, subliña que “o noso avó era un gran conversador, moi humano e próximo, interesáballe realmente a vida da xente que retrataba”

Hai, igualmente, un gran número de imaxes da súa familia. Fillo do pianista Francisco Pillado Villamil, o fotógrafo medrou nunha familia acomodada da Coruña, pero namorou de Filomena Rivadulla, filla dunha peixeira e un mariñeiro. “A familia da avoa era xente traballadora do Muro, humilde, como a que tanto retrataría despois o avó”, explica Marga Tarrío Pillado. Quedou así unido dalgún xeito a un mundo, o do mar, que sempre o fascinara. “El quería formarse para ser mariño mercante, pero non era unha idea do agrado dos pais, así que se fixo contable”, engadiu Marga.

Dende finais dos anos 40 a parella viviu, coas súas cinco fillas e seus dous fillos, nun piso da rúa Real, moi preto da desaparecida farmacia Pardo Reguera, onde o fotógrafo adoitaba reunirse con amigos cos que compartía afección. “Os netos tiñamos prohibido entrar sós no cuarto escuro, que estaba a carón da cociña. Pasaba alí moitísimas horas. O arquivo tíñao moi ben organizado, e só accedemos a el despois do seu pasamento”, recorda Marga. 

Este traballo de recuperación e preservación deste patrimonio comezou hai algo máis dunha década. Arrincou co apoio do fotógrafo José Caruncho, autor da escolma de imaxes exhibida no libro Coruña, catro temas (2014) e a exposición homónima

Este traballo de recuperación e preservación deste patrimonio comezou hai algo máis dunha década. Arrincou co apoio do fotógrafo José Caruncho, autor da escolma de imaxes exhibida no libro Coruña, catro temas (2014) e a exposición homónima. “El deunos o alento necesario para sacar dos caixóns das nosas casas placas e negativos que levaban anos e anos gardados. Moitos deles, como é natural, recollen só a historia familiar. Pero noutros latexa a vida da cidade, dos recantos que tanto lle gustaban ao fotógrafo, do dinamismo do porto, da dura vida da xente do Muro, de diferentes personaxes que nos traen á memoria sociedades da época”, resume Julia Tarrío Pillado.

A colección que a RAG pasa a custodiar está composta por unhas 2.000 placas e negativos fotográficos e uns 100 positivos en papel, así como un filme e un visor estereoscópico

Despois chegarían, entre outras iniciativas, exposicións e as colaboracións co documental Esquece Monelos, de Ángeles Huerta, e con Só hai horizonte, obra musical de Juan Vara con poemas de Xavier Seoane. “Agora chegou o momento de depositar todo este material nas mans dunha institución que garante o seu coidado e difusión para todo canto sexa de interese público e sirva para entender e ilustrar o modo de vida e as xentes que poboaron a nosa cidade nunha parte importante do século XX”, conclúe a neta do fotógrafo.

"Chegou o momento de depositar todo este material nas mans dunha institución que garante o seu coidado e difusión para todo canto sexa de interese público", destacou unha das súas netas

No acto celebrado este mércores o presidente da Real Academia Galega, Víctor F. Freixanes, agradeceu a escolla da institución como depositaria dun legado que é parte da “nosa memoria visual, que cómpre preservar e divulgar”. “Case medio século despois do pasamento de Francisco Pillado González, é unha honra para a Real Academia Galega incorporar ao seu arquivo esta significativa colección. Pasa así do ámbito privado ao acceso público para a comunidade investigadora e calquera persoa interesada na historia da fotografía en Galicia e do país”, engadiu Freixanes.