David Reinero gaña o premio Xosé Aurelio Carracedo con 'Angrois: o AVE en anacos'

David Reinero © Óscar Corral

Primeiro libro e primeiro premio. O xurado do premio de xornalismo Xosé Aurelio Carracedo, que convoca anualmente a Deputación de Ourense, decidiu este mércores que o galardón de 2014 sexa para David Reinero pola súa obra Angrois. O AVE en anacos, o volume que o pasado febreiro inaugurou a colección de Libros de Praza & Meubook, promovida por Praza Pública en colaboración co selo editorial. Para o xurado, o libro fíxose merecente de ser premiado pola "fonda e pormenorizada análise da traxedia ferroviaria de Angrois, abordada dende todos os aspectos, cunha visión ampla, crítica e obxectiva".

Mentres o accidente acontecido o pasado 24 de xullo en Compostela segue a ser obxecto de investigación xudicial e as súas consecuencias seguen a ser múltiples a valoración do xurado analiza que o traballo de Reinero parte do propio sinistro para "ir percorrendo as consecuencias e o futuro que se formula a partir do accidente". A obra é "elaborada, crítica, moi documentada e reflexiva", di a acta do premio, na que tamén se resalta a "calidade estilística e xornalística" do texto. O libro, explican, permite que o público "se informe e, á vez, tire as súas propias conclusións".

O xurado destaca que a obra é "elaborada, crítica, moi documentada e reflexiva" e resalta a súa "calidade estilística e xornalística"

Tras coñecer a concesión do premio, que lle será entregado nun acto público o vindeiro día 3 de maio en Ourense, o autor amosou, en conversa con este diario, un triplo agradecemento. "Ao xurado", pola concesión do galardón, "a Praza Pública, por apostar por este formato de información, en libro e en papel, no qu ese poden contar máis cousas e de xeito máis demorado que no día a día da información" e ao diario El País, "polo apoio nesoutro traballo diario sen o que o libro non sería posible".

Nas páxinas de Angrois. O AVE en anacos, Reinero explica que "hai unha clara responsabilidade técnico" no accidente do Alvia, que "era evitable de varias maneiras" e tras o cal "os grandes partidos pretenderon taparse entre si". Xunto a este volume tamén viu a luz baixo o selo dos Libros de Praza & Meubook a obra Dajla. Apuntes desde o Sáhara, de Héctor Juanatey, e nas vindeiras semanas incorporaranse novos títulos á colección.

Despece

  • Libros de Praza & Meubook, unha aposta polo xornalismo galego

    O segundo aniversario de Praza Pública foi o marco para a presentación dos dous primeiros títulos dos Libros de Praza & Meubook, unha iniciativa conxunta do xornal e do selo editorial para publicar anualmente unha ducia de libros de contido xornalístico. Co obxectivo de estimular a escrita xornalística alén dos xornais, das revistas e das pantallas, a colección estará composta por libros de pequeno formato e prezo reducido, no que profesionais da información abordarán temáticas sociais, culturais e políticas dende os diversos xéneros xornalísticos.

    David Reinero, Cristina Huete, Anxo Lugilde, Montse Dopico, Héctor Juanatey, Santiago Jaureguizar, Miguel Pardo ou Marga Tojo son algúns dos e das xornalistas que xa fan parte desta iniciativa, que nos vindeiros meses abordará temas como o conflito do Sáhara Occidental, realizará unha radiografía do poder caciquil na provincia de Ourense ou analizará a conxunción de éxitos deportivos e deleiba empresarial e económica que caracterizou a xestión de Augusto César Lendoiro á fronte do Deportivo da Coruña.

    Estes libros, que son tamén unha aposta por facer xornalismo en galego como unha achega para consolidar un espazo de comunicación propio no país, poderanse adquirir en librarías e a través da web de Meubook. O seu prezo será de 4,90 euros, coa posibilidade de facerse cun paquete de 4 volumes por 14 euros. As persoas socias ou doadoras de Praza Pública poderán adquirir cada libro por 3,90 euros.

    CC-BY-SA Praza Pública

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza