Os concertos do Festival Noroeste xuntaron a máis de 100.000 persoas nos seus seis días de celebración. O evento, cun total de 75 citas repartidas por toda a cidade da Coruña, levou a música a rúas, prazas, parques e praias da urbe herculina e tamén a recintos emblemáticos, coma o Castelo de San Antón, Teatro Colón ou Fundación Seoane.
Houbo un 45% de mulleres no cartel, con 75 concertos, a metade de bandas galegas
O concerto que o venres pasado ofreceu Patty Smith na Praia de Riazor foi o de maior asistencia de todo o festival, pero tamén destacou a crecente aposta polo Mercado da Colleita, polo que pasaron máis de 20.000 persoas nos seus dous días de celebración, no Paseo das Pontes.
![](https://praza.gal/storage/uploads/festival-noroeste-19-109-2115480.jpeg)
20.000 persoas pasaron polo Mercado da Colleita, no Paseo das Pontes
Nathy Peluso, Soleá Morente, Baiuca, Toundra, Belako, The Last Internationale, La URSS, Los Estanques, Anni B Sweet, Los Punsetes, Derby Motoreta’s Burrito Kachimba, Joe Crepúsculo ou Paco Ibáñez estiveron entre os concertos máis celebrados, nunha edición na que a chuvia (ao igual que o ano pasado) obrigou a modificar algúns horarios e escenarios, dificultades solucionadas sen anulación de concertos.
O evento, cun 45% de mulleres no cartel e un 50% de bandas galegas, consolídase así como "un referente entre as citas musicais do calendario estatal", destaca a organización, un festival urbano e extendido, caracterizado por levar a música ás rúas e prazas de toda a cidade en lugar de concentralo nuns poucos concertos de gran formato.