- "A educación é o maior instrumento para reducir a desigualdade social"
- "Os estudantes de ciencias saen sen formación filosófica, cando é o xerme de todas as preguntas científicas"
O colectivo Filosofía Si vén de poñer en marcha unha nova iniciativa para reclamar a recuperación da materia de Filosofía no Bacharelato baixo o nome #VocesPolaFilosofía. A través desta proposta daranse a coñecer testemuños, en formato audiovisual, de diversas personalidades do panorama cultural galego. Francisco Castro, escritor e director da editorial Galaxia, foi o encargado de inaugurar esta proposta. Os teatreiros Mofa e Befa foron os segundos en publicar o seu vídeo de apoio.
Segundo a ex deputada e profesora do IES Politécnico de Vigo, Carme Adán –impulsora xunto a outros profesores e profesoras de Filosofía Si-, o obxectivo desta nova campaña é “conseguir unha maior visibilidade da necesidade de que os centros de ensino adiquen varias horas do tempo lectivo a ensinar a pensar, a pensar de xeito crítico”.
Ademais de Francisco Castro e Mofa e Befa, outras persoas destacadas da cultura galega xa confirmaron a súa participación en #VocesPolaFilosofía, como Jorge Mira, Sés, Xurxo Mariño, Sechu Sende, Inma López Silva, Ernesto Chao e Teresa Moure, entre outras. Os seus vídeos irán publicándose nos vindeiros días.
Filosofía Si xa presentou no Parlamento Galego máis de 8.200 sinaturas de apoio á iniciativa, que será debatida no Parlamento nas vindeiras semanas. Ademais, no último mes desenvolveuse nas redes sociais a campaña #ChíaPolaFilosofía, na que participou de forma activa o alumnado de diversos centros de ensino secundario, publicando tanto citas célebres de filósofos e filódofas como reflexións propias.