Réplicas de pintadas orixinais de Banksy para "rehabilitar espazos degradados" da vila que conformarán "un percorrido turístico". O Concello de Verín tirou do artista local Álex Araújo para replicar os graffitis orixinais nunha iniciativa que se iniciou este xoves coa primeira das obras, Naked man hanging from window, unha das máis coñecidas do artista británico.
A réplica desta pintada, unha das máis coñecidas de Banksy e que apareceu en 2006 nun muro de Bristol, formará parte da mostra ao aire libre Verín, territorio Banksy, que "fará un percorrido pola obra do autor a través de muros e paredes sen uso".
O artista local Álex Araújo será o encargado de replicar as obras de Banksy en muros e paredes sen uso de Verín
"É a primeira das diferentes obras que formarán parte da exposición que se desenvolverá en Verín. Deseños icónicas do autor, que teñen ido aparecendo no Reino Unido, Gaza ou París. A serie de pintadas conformará un percorrido turístico seguindo unha orde e indo acompañadas de información pedagóxica", explica o Concello, que destaca a Banksy como, "posiblemente, o artista gráfico máis famoso do mundo".
"Xogou un papel enorme na dignificación do graffiti, no paso de consideralo vandalismo a arte. O autor caracterízase pola súa crítica do sistema, a súa implicación nas causas sociais e o seu anonimato", remata.
O artista verinense Álex Araújo xa foi o encargado de decorar escaparates da vila, ademais da biblioteca do colexio María Inmaculada, entre outras zonas.
