O Burela Pescados Rubén suma once títulos consecutivos logo de gañar a Supercopa a pasada fin de semana
A Mariña e Galicia celebraron a pasada fin de semana outra copa. Da man do xa histórico Burela de fútbol sala, equipo feminino que encadeou o seu undécimo título consecutivo ao vencer o Futsi na final da Supercopa, apañar a cuarta para as súas vitrinas e facelo tres meses despois de proclamarse campioas de Europa.
O considerado mellor equipo do mundo da especialidade mantén o ronsel de vitorias logo de que a pasada temporada sumase un novo título de Liga e Copa a un palmarés inigualable. Máis incrible aínda nunha entidade con 20 anos de historia e cuxa sección feminina viu a luz en 2008 estreándose na antiga División de Prata.
Con menos de quince anos de historia, o Burela feminino segue a sumar títulos e está considerado o mellor equipo do mundo
Desde aquela, un ascenso inmediato á elite e un continuo camiño de éxitos inaugurado coa Liga e a Copa conquistadas en 2013, ás que seguirían a Liga e a Supercopa de 2016, a Copa da Raíña, a Supercopa e a Nations Futsal Cupa de 2019 ou dúas Ligas, dúas Copas ee unha Supercopa das dúas últimas tempadas. De broche de ouro, o campionato de Europa acadadado en Lugo o pasado decembro tras vencer o Pescara italiano na final.
Cun total de 200 deportistas nas diferentes categorías, unha importante masa social na Mariña e a fazaña de contar con dous equipos -masculino e feminino- na elite desde un concello de menos de 10.000 habitantes, nada fai pensar que novos títulos cheguen nos vindeiros meses.
Ademais, e tal e como destaca a propia entidade, o Burela Pescados Rubén non só ocupou portadas polos seus éxitos deportivos. En 2018 converteuse no primeiro club en formalizar un convenio colectivo de xogadoras profesionais, con axudas á conciliación e á crianza.
