Despece

• O Deportivo despídese batendo marcas

  O Deportivo despediuse onte da Segunda División batendo marcas. Gañou no Madrigal ante o Villarreal B (0-1) cun gol de Bodipo e superou o récord histórico de puntos na categoría de prata, que ostentaba o Valladolid con 88. Sumou 91 o equipo coruñés grazas a unha vitoria que incrementa un pouco máis outro récord: o de triunfos nunha temporada. 29 de 41. 

  Ademais, e para completar unha campaña excepcional, un galego, o coruñés Álex Bergantiños, converteuse no único xogador da categoría que disputou todos os encontros do campionato. 42 partidos para un canteirán do barrio da Sagrada Familia nun encontro completado co tanto de Bodipo, un dianteiro que foi alma do vestiario pero que non contara con oportunidades no ano do ascenso. 

  

• O Lugo incrementa a ilusión polo ascenso

  Puido ser mellor, pero foi dabondo. O Lugo recuperou a cara dos seus mellores tempos e venceu con claridade o potente Atlético Baleares por 3-1. Calquera afeccionado lucense asinaría este resultado na ida da eliminatoria de ascenso a Segunda ante un conxunto cheo de ex futbolistas de Primeira. Pero un deles, o ex bético Dani, deixoulle un sabor agredoce aos de Setién, que a falta de tres minutos goleaban 3-0 e semellaban ter sentenciado o pase á seguinte rolda. 

  Terá que sufrir o Lugo, pero farao pouco se dentro dunha semana en Palma xoga coa intensidade e o bo facer que o fixo este domingo no Anxo Carro. Non pasaran nin 20 minutos cando os lucenses xa gañaban 2-0 grazas aos golazos de Quero e Belencoso, que acertaron nas primeiras ocasións claras dos galegos, e á calidade dun Isma imperial xogando entre liñas. 

  Desaproveitou o Lugo algunha ocasión máis, ao igual que o Baleares, ata que o arxentino Belforti fixo o terceiro no comezo da segunda parte. Todo parecía controlado para os branquivermellos, aos que o partido se lles fixo demasiado longo. Sobroulle tres minutos. No 87, Dani marcou o tanto que mantén as esperanzas dos mallorquinos, pero que non debería diminuír nin un chisco a ilusión dun equipo que demostrou que pode co que se lle poña por diante. 

  Vitoria do Cerceda

  Na loita polo descenso a Segunda B, e logo de se confirmar o éxito do Ourense, o Cerceda viaxará con vantaxe a Fuenlabrada tras derrotar por 2-1 o conxunto madrileño no Roxo. Os goles de Joselu e Souto danlle vantaxe aos branquivermellos, que reclamaron un claro penalti ao coruñés Xaco. 

  Por outra banda, o Alondras perdeu pola mínima en Santander ante o Racing B (1-0) e terá que remontar no encontro de volta para seguir loitando por subir á categoría de prata.