"O Dépor é da Coruña": 'Aquí tamén se fala' aprema o club a usar o topónimo oficial nunha ambiciosa campaña

Rapazada do IES Rafael Dieste presenta a campaña "O Dépor é da Coruña" CC-BY-SA Aquí tamén se fala

A exitosa iniciativa cultural Aquí tamén se fala do IES Rafael Dieste, promotores da maior campaña de dinamización da lingua galega e premiada en numerosas ocasións, lánzase agora a unha acción de promoción de lingua cun claro e ambicioso obxectivo: que o Real Club Deportivo "empregue o topónimo oficial a partir da seguinte temporada, 2025-2026, na que o club celebra o seu 120 aniversario"

'Aquí tamén se fala' proponse que o Deportivo "empregue o topónimo oficial a partir da seguinte temporada, 2025-2026, na que o club celebra o seu 120 aniversario"

A campaña, que colle o ronsel pero con moita máis forza, da que hai anos levaran a cabo seareiros branquiazuis, está liderada e promovida polos profesores Alberto Pombo, Arcadio González e Mónica Reigía e nace xa, como lembran, cunha "chea de apoios" que inclúen o presidente da Real Academia Galega, a presidenta do Consello da Cultura Galega, o reitor da Universidade da Coruña, o conselleiro de educación e os responsábeis de lingua da Xunta de Galicia, da Deputación e do Concello da Coruña, o presidente da Federación de Peñas, ex-capitáns do club, como Álex Bergantiños ou Dani Mallo, e representantes do tecido cultural ou expertos en toponimia.

Álex Bergantiños, ex-capitán do Dépor, asina o manifesta pola restitución do topónimo oficial no club CC-BY-SA Aquí tamén se fala

"Ademais, e representando o sentir de varios milleiros de estudantes, todos os institutos públicos da Coruña, representados nos seus directores e directoras, nos xefes e xefas dos departamentos de lingua e nos e nas responsábeis dos Equipos de dinamización da lingua galega, sumaron o seu apoio á campaña galeguizadora", lembran os impulsores de Aquí tamén se fala

Todos e todas elas asinaron un breve manifesto que "encoraxa o club, institución centenaria e que vén demostrando un firme compromiso co galego nos últimos anos, a restituír o topónimo á súa forma oficial, como xa fixeron outros equipos".

Ademais, os responsábeis do proxecto estrean este mércores unha nova páxina web (aquitamensefala.gal) con información e recursos, e anuncian xa novas accións que ampliarán o percorrido da iniciativa. A primeira delas terá lugar este mesmo domingo, durante a previa do xogo do Deportivo contra o Cádiz, onde estarán repartindo e regalando 15.000 colantes co slogan da campaña, “O Dépor é da Coruña”, nas inmediacións do estadio. 

Cartel da campaña "O Dépor é da Coruña" CC-BY-SA Aquí tamén se fala

Desde a plataforma estudantil animan a todos aqueles que queiran apoiar esta nova iniciativa a etiquetar as contas de Aquí tamén se fala nas redes sociais (@aquitamensefala), así como a empregar o cancelo #odéporédacoruña. 

No manifesto, os asinantes —entre os que se atopan Ricardo Cao, reitor da UDC; Víctor Freixanes, presidente da Real Academia Galega; Rosario Álvarez, presidenta do Consello da Cultura Galega; Valentín García, secretario xeral da Lingua da Xunta; Sol Agra, responsable de Lingua da Deputación da Coruña; Xurxo Souto, Henrique Rabuñal ou o concelleiro de Cultura e Turismo da Coruña, Gonzalo Castro—, lémbrase que "desde 1906, o Dépor viu medrar a Real Academia, as Irmandades da Fala, a Cova Céltica, o pulo editorial de Lar e Nós, a reivindicación do Estatuto ou a Lei de Normalización" e ínstase claramente a unha mudanza do topónimo longamente reclamada e nunca satisfeita. 

O manifesto, que apoian Xunta, Concello, Deputación ou Academia Galega, pide "coraxe e determinación" para que o Dépor demostre "compromiso e responsabilidade" cunha "demanda de longo percorrido"

"Superando a longa noite de pedra, outras institucións e clubs deportivos restituíron con dignidade e orgullo histórico os seus topónimos oficiais e patrimoniais. Deixar pasar esta eiva ten consecuencias que xeran disonancia e confusión na íntima relación do club e a cidade, pois é imposíbel pensar A Coruña sen o RC Deportivo, nin o Dépor sen A Coruña", di o manifesto, que lembra que o apoio do club á lingua galega "é manifesto na comunicación que realiza nos correos, nas redes sociais ou desde o propio estadio".

"Por todo iso, polas xeracións futuras, pola unión entre club e seareiros e por dar cabo dunha demanda que vén de longo percorrido, coidamos que o Deportivo debe ser da Coruña e que o cento e vinte aniversario do club pode ser, ademais, unha oportunidade histórica para demostrar compromiso e responsabilidade. Coraxe e determinación. Orgullo e identidade", remata un manifesto que apela directamente o club —propiedade de Abanca— e faino, ademais, co apoio de todas as administracións ou de xogadores emblemáticos e ata hai pouco membros do seu consello de administración como Álex Bergantiños. 

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.