Unha ducia de agasallos
Se cadra es de agardar polos Reis Magos ou na túa casa está entre as últimas polas que pasa o Apalpador. Ou non tes amizade con ningún deles pero tes en mente unha persoa á que sorprender. Sexa como for, estes días préstanse a agasallar e hai unha morea de presentes que naceron e medraron coas raíces no país. Velaí van algúns.
-
01Libros galegos
Non por ser un clásico deixa de ser un bo agasallo, máis ben ao contrario. A emigración galega, a historia dunha vaca caníbal, a figura e a obra de Rosalía para grandes e pequenos, sons que chegan ao corazón ou reflexións sobre o futuro do noso sistema educativo son só algunhas posibilidades, aínda que hai moitas máis.
-
02Unha banda sonora para o 2014
Se buscas unha banda sonora para o ano que vén de comezar hai unha boa diversidade de estilos sen saír do país. Caxade, Grampoder ou Sés teñen propostas acabadas de saír do forno. Zënzar ou Os da Ría teñen discos que xa están un chisco máis maduros pero que saben igual de ben. E se prefires agasallar música ao vivo, Cantos na Maré pode ser unha boa opción para botar a andar o 2014.
-
03
Cinema
Vilamor e Pradolongo, de Ignacio Vilar, as Dúas letras de Fina Casalderrey e Eloy Varela ou a gravación dun espectáculo de Carlos Blanco no Teatro Colón da Coruña son opcións audiovisuais do país ben apetecibles.
-
04Xogos
Unha escola para escribir coa axuda de Xabarín, un crebacabezas para montar o país enteiro cos nenos e nenas ou o Galeoke para deixar a gorxa a cantar poden dar moitas horas de diversión coa familia ou cos amigos.
-
05Téxtil do país
Se tes pensado botarte ao monte no 2014, se non queres ser xoguetiño de ninguén, se buscas reivindicar o agro con humor ou se queres que se vexa ás claras que che gusta o galego, por que non levalo na camisola?
-
06Unha boa paparota
Se nos poñemos a citar propostas gastronómicas precisamos varias ducias. Así que acudimos a Agasallo.eu e atopamos, entre outras, dúas posibilidades para agasallar un xantar ou unha cea con xeito n'A Nave de Vidán ou n'O Dezaseis, en Compostela.
-
07Un detalle gastronómico
Se cadra a paparota non é nun restaurante, senón na casa de alguén e non queres ir coas mans baleiras. Nese, caso, por que non chegas cun escumoso para brindar, cun licor para a sobremesa, cunha cervexa artesá ou cunha xenebra galega?
-
08Un carballo ou un castiñeiro para o monte Pindo
A asociación que pula pola declaración do Monte Pindo como parque natural está a tentar recuperar este tesouro natural do país, arrasado polo lume. Para isto piden a colaboración da cidadanía e un carballo ou un castiñeiro é son agasallos que o monte agradecerá infinitamente.
-
09Unha axenda ou un almanaque
Outro agasallo tan clásico como útil. Para levar ben a conta dos días sen confiarlle os plans a un trebello tecnolóxico hai, cando menos, dúas propostas interesantes: a axenda editada por Implicad@s no desenvolvemento e o calendario con fotografías de Ruth Matilda Anderson que propón Xerais.
-
10Tecnoloxía galega
Porque non hai que ollar fóra para agasallar, por exemplo, un móbil ou unha tableta. Unha posibilidade é ollar para o catálogo de Primux.
-
11Un Nadal cos Bolechas
Se tes nenos ou nenas cerca aínda estás a tempo de levalos a pasar unha tarde de festa cos Bolechas. Estes días andan por Lugo, A Coruña e Vilalba.
-
12Medios amigos, plurais e en galego
Se moitos e moitas agasallamos medios en galego, este será un agasallo que dure moito. Por que non lle ofreces a alguén que queiras ser parte da comunidade lectora de Praza?
