Unha ducia de asfaltados de pistas antes das municipais
O 26 de maio hai eleccións municipais, así que, como se fose unha obriga legal, concellos de toda cor e tamaño están estes días a asfaltar pistas e rúas. Porque as inauguracións están prohibidas desde que se convocan os comicios, pero nada di a lei en contra do reparto de piche como reclamo electoral. Repasamos unha ducia desas obras.
-
01Nigrán
A semana pasada, ás portas da campaña electoral, o Concello de Nigrán divulgaba os traballos de asfaltado que se estaban a realizar en 13 camiños e rúas da parroquia de Camos por 140.000 euros.
-
02Cuntis
O Concello de Cuntis tamén vén de realizar diversos asfaltados nas súas parroquias, como este nesta pista de San Mamede.
-
03Sanxenxo
"Maquinaria a pleno rendemento" anunciaba hai uns días o Concello de Sanxenxo para publicitar o asfaltado de dez pistas municipais.
-
04Ponteareas
A falta de tempo para que os asfaltados estean listos antes das municipais, o Concello de Ponteareas divulgou unha recreación infográfica de como quedará a zona do Alto da Gloria cando se rematen as obras.
-
05As Neves
A finais de marzo, coincidindo cunhas obras nunha estrada autonómica das proximidades, o Concello das Neves non quixo ser menos e tamén iniciou obras de asfaltado na zona de Setados.
-
06Oia
Pero a Xunta non se limita a asfaltar as súas estradas senón que tamén reparte fondos para que os concellos arranxen os seus camiños e despois visítaos para que os votantes teñan claro de onde saen os cartos, como neste caso no concello pontevedrés de Oia a principios de abril...
-
07Os Blancos
...ou nestoutro no municipio ourensán dos Blancos tamén nas últimas semanas.
-
08A Coruña
Tamén nas cidades os concellos asfaltan camiños, como esta obra no coruñés Castaño de Eirís divulgada polo concelleiro do ramo hai mes e medio.
-
09Vigo
En Vigo non todo son humanizacións, que requiren moito tempo de traballos, e o Concello tamén está a repartir nas últimas semanas asfaltados por diversas rúas e camiños da cidade.
-
10Brión
Antes da execución dos asfaltados, os concellos tamén publicitan os pasos administrativos previos, como fixo o de Brión a comezos de abril cando adxudicou obras por 445.000 euros para seis camiños.
-
11Vilamartín de Valdeorras
Tamén a comezos de abril, e na outra punta de Galicia, o Concello de Vilamartín de Valdeorras comezou traballos de asfaltado.
-
12Chantada
Nestes días preelectorais as obras están a chegar mesmo a corredoiras de pedra como o camiño de Belesar en Chantada, cuxa agresiva actuación vén de ser denunciada por En Marea.