Unha ducia de bispados itinerantes de Galicia
A pasada fin de semana Mondoñedo celebrou os 800 anos do inicio da construción da súa catedral, sé dun bispado que puido acabar en Braga, A Pastoriza, Foz ou Ribadeo. Repasamos unha ducia de bispados itinerantes da historia de Galicia.
-
01
Dume
Veciña de Braga, tras a caída de Roma foi unha importante localidade do reino suevo convertida en sé dun bispado grazas a san Martiño de Dumio, ou Dume, considerado o conversor da Gallaecia sueva do arrianismo ao catolicismo. É unha das orixes do actual bispado de Mondoñedo.
-
02
Bretoña
A parroquia de Bretoña, na Pastoriza, é habitualmente identificada como a sé do bispado que crearon no norte de Galicia as poboacións cristiás romano-británicas que emigraron coa chegada ás illas británicas dos pobos xermánicos.
-
03
San Martiño de Mondoñedo, en Foz
Tras diversas invasións, os bispados de Dumio e Bretoña refuxiáronse na basílica de San Martiño de Mondoñedo, en Foz.
-
04
Val de Brea
A comezos do século XII a sé de San Martiño de Mondoñedo foi trasladada da actual Foz cara ao interior, ao Val de Brea ou Bría, o emprazamento actual que acabaría herdando o nome do anterior mosteiro.
-
05
Ribadeo
Antes de comezar a construírse a actual catedral, o bispado de Mondoñedo chegou a ter a súa sé durante unha breve etapa en Ribadeo.
-
06
Mondoñedo
Hai agora 800 anos comezou a construírse a actual catedral de Mondoñedo que consolidou a importancia comercial que xa tiña a vila ata convertela nunha das sete capitais de provincia do antigo Reino de Galicia. Durante varios séculos os seus bispos seguiron a ter o título de Episcopus Dumiensis.
-
07
Ferrol
O ascenso da cidade de Ferrol e o declive da de Mondoñedo fixo que en 1959 o bispado pasase a ter o seu actual nome composto e unha concatedral.
-
08
Braga
Ao igual que o bispado de Dumio se refuxiou en Mondoñedo, o de Braga fixo o mesmo en Lugo tras a invasión musulmá da península.
-
09
Tui
En Tui hai sé episcopal desde época romana, pero coa invasión musulmá os seus bispos, como fixeron os de Braga e Dumio, refuxiáronse noutros lugares, neste caso en Iria Flavia.
-
10
Vigo
Ao igual que ocorreu coa de Mondoñedo-Ferrol, en 1959 a diocese de Tui tamén foi renomeada engadindo o nome da cidade de Vigo, na que tamén hai unha concatedral.
-
11
Iria Flavia
Sé dun bispado en época romana, no século IX foi trasladado a Compostela tras o achado dos supostos restos do apóstolo Santiago. Hoxe é unha parroquia de Padrón.
-
12
Compostela
Despois de que o bispo Teodomiro de Iria Flavia dese a coñecer este campo, moito creceu ata converterse hoxe nunha das principais arquidioceses católicas do mundo.